2nd Chronicles

2nd Chronicles Chapter 36

Abeg click here to share dis post

Jehoahaz As King of Judah

  1. Naso di pipo of di land carry Jehoahaz wey be di son of Josiah, and dem  make am king to take hin papa position for Jerusalem.
  2. Jehoahaz na twenty-three years old wen he be king, and he be king for  three months for Jerusalem.
  3. Di king of Egypt no gree let am rule for Jerusalem. He put tax for di land: 3.4 tons of silver, and 3.4 kg of gold.
  4. Di king of Egypt make Jehoahaz broda Eliakim, as king of Judah plus Jerusalem, and he change hin name to Jehoiakim. Necho gbab hin broda  Jehoahaz, con carry am go Egypt.

          Jehoiakim As Evil King of Judah

5. Jehoiakim na twenty-five years old wen he be king, and he be king for  eleven years for Jerusalem. He do evil tins for Baba-God eyes.

6. King Nebuchadnezzar of Babylon attack am, he tie am wit bronze  chains, con carry am komot go Babylon.

7. Nebuchadnezzar carry some properties from Baba-God house, go Babylon and he put dem for inside hin palace for there.

8. Di rest tins wey happun wen Jehoiakim be king, plus di tufiakwa tins wey he do, and di wrong tins wey he do—dem write dem for di Book of di Kings of Israel and Judah. Hin son Jehoiachin con take hin place as king.

Jehoiachin As Evil King of Judah

9. Jehoiachin na eighteen years wen he climb di king-chair, and he be king  for three months and ten days for Jerusalem. And he do bad-bad-tins for  Baba-God eyes.

10. For di starting of di year King Nebuchadnezzar sey make dem carry am come Babylon, wit di beta-beta-tins wey dey for inside Baba-God house. Nebuchadnezzar con make hin uncle, Zedekiah, as king of Judah plus Jerusalem.

Zedekiah As King of Judah

11. Zedekiah na twenty-one years old wen he climb di king-chair, and he  rule for eleven years for Jerusalem.

12. He do bad-bad-tins for Baba-God eyes. He no gree sempe (humble hinsef) for Jeremiah di prophet, wey be Baba-God tok-pesin.

13. Evensef, he change-am-for King Nebuchadnezzar, wey bin make am swear agreement wit Baba-God. He get coconut-head and he dey do gragra, and he no gree turn follow Baba-God wey be di Oga of Israel.

As Jerusalem Take Fall

14. To add-join, all di leaders of di priests plus di pipo con dey do more-more bad-bad-tin, dem do di same tufiakwa tins [dem worship idols] wey di nations around dem dey do, con corrupt Baba-God house wey he don make holy for inside Jerusalem.

15. Baba-God wey be di Oga of dia papa-papa-papa no stop to dey warn dem tru hin messengers, becos he sorry-for hin pipo and di place where he dey stay.

16. But dem yab Baba-God messengers, dem fashi hin warnings, con laff hin prophets. Naso di pipo of Babylon scata Jerusalem. Las-las Baba-God vex for hin

pipo well-well sote notin fit save dem.

17. Baba-God bring di king of Babylon against dem, wey kill dia young guys wit sword for inside di house of dia holy-place. He no sorry-for young guys or babes, or even pipo wey don old or pipo wey no strong. Baba-God put all of dem for Nebuchadnezzar hands.

18. Di king carry all di tins for inside Baba-God house go Babylon, whether na big  or small—evensef, he carry di beta-beta-tins wey dey inside di stores of Baba-God house and di stores of di king and hin princes—he carry all dis tins go Babylon.

19. Dem burn Baba-God house, con break di wall of Jerusalem reach ground. Dem burn all dia palaces, con scata all di fine-fine-tins.

20. He carry all di pipo wey escape sword—go Babylon. Dem serve him plus hin sons until di Persian kingdom con start to dey rule.

21. Di land enjoy e Sabbath rest all di time wey e empty, until di seventy years complete—so dat  Baba-God message wey he tok tru Jeremiah go happun.

Di Words of Cyrus

22. For di first year wen king Cyrus of Persia sidon for di king-chair, so dat Baba-God promise we he make tru Jeremiah go come to pass, Baba-God ginger di king of Persia to write law for hin whole kingdom, wey tok sey,

23. “Dis na wetin Cyrus di king of Persia dey tok: ‘Baba-God of heaven don give me all di kingdoms of di earth, and he don tell me to build house for am for inside Jerusalem, wey dey for Judah. Which one of una dey among hin pipo? Make hin God dey wit am, and make he dey go up to Jerusalem.’”

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website