Esther Chapter 6

Abeg click here to share dis post

Di King Honor Mordecai

  1. Di king no fit sleep dat night, so he tok sey make dem bring di book of history, plus di records, and dem read am for di king.
  2. Dem con see am for inside di history sey Mordecai bin report Bigthana plus Teresh, two of di king officers wey dey guard hin doormot, and wey bin plan togeda to kill King Ahasuerus.
  3. Di king con ask sey, “Which respect plus levels Mordecai receive for wetin he do?” Hin servants con ansa am sey, “We neva do anytin for am.”
  4. Di king con tok sey, “Who dey inside di palace?” Now Haman just enta di outside part of di palace to tok to di king about as he go take hang Mordecai for di hanger wey he don set for Mordecai.
  5. Di king servant con ansa am sey, “Haman dey stand inside di palace.” So di king tok sey, “Bring am come meet me.”
  6. Wen Haman enta, di king con ask am sey, “Wetin we go do for di man wey di king like to respect?” Now Haman con dey reason hinsef, “Who dey apart from me wey di king go like to honour?”
  7. So he ansa di king, “For di man wey di king like to honour,
  8. Make dem bring fine cloth wey di king don wear before, and horse wey di king don ride—horse wey dem put royal crown for e head.
  9. Den make one of your top men dress di man wey you wan respect—wit dis cloth, con carry di horse go meet am. Make dem escort am wit di horse around di streets. And make dem dey halla as dem dey go: ‘See as di king dey pay pesin wey he wish to respect!”
  10. Di king con tell Haman sey, “Oya go sharp-sharp, bring di clothes plus di horse, and do exactly wetin you tok about—to Mordecai wey be di Jew, wey dey sidon for di king gate. No forget anytin wey you don advice me to do.”
  11. So Haman go carry di cloth and di horse. He wear di cloth for Mordecai, con put am for back of horse, dem pass di streets of di city, con dey tok for hin front sey, “Dis na wetin we go do for di man wey di king like to honour!”
  12. Lata-lata, Mordecai go back to di king gate. But Haman rush go hin house wit sadness and he cover hin head.
  13. So he tell Zeresh wey be hin wife plus all hin padi everitin wey happun to am. Hin advisers plus hin wife Zeresh, con tell am sey, “Since Mordecai wey don start to fall your hand so—na Jew, you no fit fight am—or else you go surely fall!”
  14. As dem still dey follow am tok, di king servants just show, con sharply carry Haman go di party wey Esther don arrange.


Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website