Nehemiah

Nehemiah Chapter 3

Abeg click here to share dis post

Dem Build Di Wall Again

  1. Eliashib wey be di high priest and hin fellow priests wey be hin brodas, con stand up to build di Sheep Gate. Dem bless am, con set di doors for e place, and dem build am reach di Tall-house of Hundred, con bless am, and dem build am reach di Tall-house of Hananel.
  2. Di men of Jericho build di place afta where Eliashib build, and Zaccur wey be di son of Imri build next area.
  3. Di sons of Hassenaah build di Fish Gate. Dem set di pillars for di doors, con put di doors plus di bolts and di bars for e position.
  4. Meremoth wey be di son of Hakkoz repair di next area. Next to am na Meshallam wey be di son of Berekiah, di son of Meshezabel do some repairs, and next to am na Zadok wey be di son of Baana sef do some repairs.
  5. Di men of Tekoa repair di next area, but dia leaders no gree work under dia supervisors.
  6. Joiada wey be di son of Paseah plus Meshullam wey be di son of Besodeiah repair di Old Gate. Dem set di pillars for di doors, con set di doors and bolts, plus bars—for dia position.
  7. Next to dem na Melatiah from Gibeon and Jadon wey be Meronothite, di men of Gibeon plus Mizpah—dem repair di house of di govnor of di territory afta river Euphrates.
  8. Uzziel wey be di son of Harhaiah, one of di goldsmiths repair di next area, and Hananiah wey be one of di pipo wey dey make perfume repair di next area. Dem build Jerusalem reach di Broad Wall.
  9. Rephaiah wey be di son of Hur—wey be di ruler of half of Jerusalem repair di next area.
  10.  Next na Jedaiah wey di be di son of Harumaph repair di wall wey dey opposite hin own house, and Hattush wey be di son of Hashabneiah repair di next area.
  11. Malkijah wey be di son of Harim, and Hasshub wey be di son of Pahath-moab repair anoda area, and di tall-house of Ovens.
  12. Shallum wey be di son of Hallohesh, wey be ruler of half of Jerusalem repair di next area—wit hin daughters wey epp am.
  13. Hanun and di pipo of Zanoah nahin repair di gate wey dey for bottom-of-di-mountain. Dem set di doors and dem fix e locks, plus bars. Dem still repair di 1,500 feet wall wey reach di Dustbin Gate.
  14. Malkijah wey be di son of Recab, di ruler of di area of Beth-hakkerem repair di Dustbin Gate. He build am, con put di doors, plus locks and bars.
  15. Shallum wey be di son of Col-Hozeh, ruler of di area of Mizpah nahin build di Water Gate. He build am, he roof am, con put doors plus bolts and bars. He repair di wall of di Pool of Siloah sef, wey dey near di King Garden—far-far go reach di steps wey dey go down from di City of David.
  16. Nehemiah wey be di son of Azbuk, di leader of di half area of Bethzur—nahin repair di next area. He build di wall from one place opposite di burial ground of David family— far go reach di side where dem dig pool and near di House of di guards.
  17. Group of Levites wey Rehum wey be di son of Bani dey supervise—nahin repair di next area. Naso Hashabiah wey be di leader of di half territory of Keilah rapair hin own area.
  18. Dia fellow Levites wey dey under Binnui wey be di son of Hashabiah wey be di leader of di oda half of di territory of Keilah—na dem repair di next area.
  19. Next to am na Ezer wey be di son of Jeshua—di rulers of Mizpah repair anoda area, he repair anoda area opposite di place wey dem dey climb to di weapon-house, for di angle of di wall.
  20. Next to am na Baruch wey be di son of Zabbai, wey seriously repair anoda area, from di angle of di wall, to di doormort of di house of Eliashib wey be di high priest.
  21. Next to am na Meremoth wey be di son of Uriah, di son of Hakkoz wey repair anoda area, from di doormot of di house of Eliashib to di end of di house of Eliashib.
  22. And next to dem na di priests from di areas wey dey around—and dem do some repairs.
  23. Afta dem, na Benjamin plus Hasshub repair opposite dia house. And next to dem na Azariah wey be di son of Maaseiah—di son of Ananiah wey repair di side near hin house.
  24. Afta am na Binnui wey be di son of Henadada, wey repair anoda area of di wall, from Azariah house to di angle plus di corner.
  25. Palal wey be di son of Uzai, make some repairs for opposite di place wey di wall take turn, plus di tall-house wey come up from di king high house—wey dey near di yard of di prison. Afta am na Pedadaih wey be di son of Parosh.
  26. And di servants for Baba-God house (Nethinims) wey dey live for Ophel. Dem repair opposite di Water Gate wey dey faca di east, plus di tall-house wey come up.
  27. Next to dem, di men of Tekoa wey repair anoda area opposite di big tall-house wey come up—far-far go reach di wall of Ophel.
  28. Di priest repair on top of di Horse Gate, all of dem repair front of dia own house.
  29. Next to dem na Zadock wey be di son of Immer, he repair opposite hin house. Next to am na Shemaiah wey do some repairs. Shemaiah na di son of Shecaniah—di guard for di East Gate.
  30. Next to am na Hananiah wey be di son of Shelemiah, plus Hanun wey be di sixth son of Zalaph—wey repair anoda area. Afta dem na Meshullam wey be di son of Berechiah wey repair opposite hin house.
  31. Next to am, Malkijah wey be one of di goldsmiths, he repair reach di house of di servants for Baba-God house (Nethinims), and di house of di market-pipo, opposite di Miphkad Gate, far-far go reach di rooms for up—wey dey for corner.
  32. Di goldsmiths plus di market-pipo repair di area between di rooms wey dey for upstairs, for di corner—far-far go reach di Sheep Gate.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website