Psalm (Pidgin Bible)

Psalm Chapter 9

Abeg click here to share dis post

Tanks-giving For Baba-God Justice

  1. To di music Producer. To di tune of “Di
    death of di Son.” Dis na Psalm of David. Oh
    Baba-God, I go salute you wit my whole
    heart; I go tok about all your ogbonge works.
  2. I go dey happy, con dey celebrate inside
    you; I go sing praises to your name—Oh
    Most High.
  3. My enemies turn back; dem go fall—con kpeme for your front.
  4. Na you epp me fight for my right and my business; you don sidon for your king-chair, and you dey judge in di right way.
  5. You don change-am-for di nations, con scata wicked pipo; you don komot dia name throway for ever and ever.
  6. Scata-scata wey no dey finish don catch di enemy; you don scata cities and no-pesin go remember dem again.
  7. But Baba-God dey-on-board forever; he don arrange hin king-chair for judgement.
  8. He go judge di world wit hin church-mind; he go judge di nations wit justice.
  9. Na Baba-God dey protect pipo wey dem dey oppress, na inside Baba-God pipo dey hide dia head put—wen yawa gas.
  10. Those pipo wey know your name go trust you, Oh Baba-God, becos you no dey ever fashi pipo wey dey fyne you.
  11. Sing praises to Baba-God—wey dey stay for Zion; tell di nations about hin handwork.
  12. Baba-God wey dey revenge against killers—dey remember dem; Baba-God no dey forget di cry of poor pipo.
  13. Chai Baba-God, sorry-for me, reason di wahala wey I dey face from pipo wey hate me, you wey carry me komot from di teeth of death,
  14. so dat I go fit tok about your praise—for front of di gates of Zion, and I go happy sey you save me.
  15. Di nations don fall inside di hole wey dem dig; di net wey dem set—don hook dia own leg.
  16. Everi-pesin know Baba-God—for hin justice; wicked pipo handwork dey put dem for trap.
  17. Wicked pipo dey go straight to grave—plus all di nations wey fashi Baba-God.
  18. But Baba-God no go always fashi pipo wey need epp; poor pipo no go lose hope forever.
  19. Stand up, Oh Baba-God, no let ordinary man win you; judge di nations for your front.
  20. Make fear catch dem, Oh Baba-God! Make di nations know sey dem be ordinary men

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website