Psalm (Pidgin Bible)

Psalm Chapter 107

Abeg click here to share dis post

Na Baba-God Dey Save Us

  1. Give tanks to Baba-God becos he dey
    good, and hin mercy dey last forever.
  2. Make di pipo wey Baba-God don save
    tok dis tin—those wey he save from di
    enemies hand,
  3. those pipo wey he gada from di lands,
    from east plus west, north and south.
  4. Many of dem dey waka upandan for
    inside desert—dem no see road enta city wey dem fit settle put.
  5. Hunger wan kill dem finish, and dem no see water to drink, dia soul con taya inside dem.
  6. Naso dem con cry to Baba-God inside
    dia kasala, and he free dem from dia palava.
  7. He carry dem pass di correct road—con enta di city wey dem fit settle put.
  8. Oh make men give tanks to Baba-God for hin goodness, and hin ogbonge works for men pikin!
  9. Baba-God dey make di wish of man soul come to pass, and he dey make di hungry soul belleful wit beta tins.
  10. Those wey sidon for darkness, and inside di shadows of death—wey be prisoners of suffer-head and wey dey in chains,
  11. becos dem turn dia back on Baba-God word, and dem no gree accept di advice of di Most High,
  12. so he bring dia heart down wit hard labour; dem fall for ground but no-pesin dey to epp dem.
  13. Dem con cry to Baba-God inside dia yawa, and he save dem from palava.
  14. He carry dem komot from inside darkness and di shadow of death, con scata dia chains to pieces.
  15. Chai….make men praise Baba-God becos of hin goodness, and hin ogbonge works for men pikin,
  16. becos he don scata di gate of bronze, con cut thick iron to pieces.
  17. Some of dem turn to mugu as dem no gree follow Baba-God way, naso dem consuffer well-well becos of dia sins.
  18. Dem hate everi kain food, con dey waka go near di gates of death.
  19. Naso dem cry to Baba-God inside dia wahala, and he save dem from dia palava.
  20. He send hin word go out, he heal dem; and he save dem from grave.
  21. Chai….make men praise Baba-God becos of hin goodness, and hin ogbonge works for men pikin!
  22. Make dem sacrifice tanks offerings, con tok about hin work wit happiness.
  23. Odas wey komot go big-river wit ships; wey dey do business for di big-big-river,
  24. dem see di works wey Baba-God don do, hin ogbonge works for inside-inside di big-rivers.
  25. He tok and heavy breeze blow—wey make di water con rise go up wit big wave.
  26. Di wave high reach heaven, con nack for di ground of di deep big-river; dia mind condey cut for di kasala.
  27. Dem stagger, con dey move upandan—like men wey don high wit ogogoro; and all dia skills finish.
  28. Naso dem con cry to Baba-God from inside dia wahala, and he carry dem komot from dia palava.
  29. He make di strong-breeze cool down; so dat di waves of di big-river con fem [quiet ]!
  30. Dem happy wen di wave calm down, and he escort dem reach where dey safe for dem.
  31. Chai….make men praise Baba-God becos of hin goodness, and hin ogbonge works for men pikin!
  32. Make dem cut-cap for Baba-God for where hin pikin gada, and praise Baba-God for where di senior-men gada.
  33. He turn rivers to desert, and he turn streams to dry ground.
  34. He turn land wey dey produce fruit—to dry land, becos of di badbelle pipo wey dey stay for there.
  35. He turn di desert to pool of water, and dry ground to water wey dey flow,
  36. na for there he allow hungry pipo settle down, so dat dem go fit build city wey dem fit live.
  37. Dem make farm, con plant grape-farm wey bring beta harvest.
  38. He bless dem, con make dem burku, and he no let dia animals kpeme.
  39. Wen dem con small and wen dem dey low-key wit oppression, wahala and sadness,
  40. he put bad-mind inside di leaders, con make dem dey waka- lose inside desert—for where road no dey.
  41. But he carry poor pipo go up, far komot from dia suffer-head, con add-join dia family members.
  42. Pipo wey get clean-heart dey see wetin happun, and body sweet dem, but all di badbelle pipo go sharrap dia mouth.
  43. Any-pesin wey get-sense go observe dis tins, con reason Baba-God soft-love.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website