Psalm (Pidgin Bible)

Psalm Chapter 55

Abeg click here to share dis post

Dem Don Betray Me

  1. To di music producer. Wit string
    instrument. Dis na Maskil of David. Make you listen to my prayer, Oh Baba-God, no throway-face as I dey ask for epp!
  2. Hear me, and ansa me. I no dey taya to complain, and I dey raise my voice dey cry.
  3. Becos of di voice of enemy, becos of di oppression of wicked pipo; dem dey put wahala for my head, dem hate me wit vex.
  4. My heart dey seriously pain me inside; di fear of death dey for my head.
  5. My mind dey cut, and my body dey shake; fear don cover my head.
  6. I con tok sey, “Chai, I wish sey I get feathers like dove! I go fly go where I go fit rest—
  7. True-true, I for fly go far-far, and I go stay for desert;
  8. I go rush escape from di heavy breeze and strong breeze.
  9. Oh Baba-God, scata badbelle pipo, make dem no understand each oda, becos I don see fight- fight and kwanta inside di city.
  10. Day and night, dem dey waka upandan on di city walls; evil plus wahala full inside am.
  11. Scata-scata dey for di city; oppression and wuru-wuru no dey komot from di streets.
  12. If enemy dey insult me, I fit endure am, if badbelle pipo wan change-am-for me, I fit komot for where dem dey.
  13. But na you, wey be man like me, my padi, my pesina-pesin—
  14. wey we bin dey share beta ideas togeda, and we bin dey waka togeda—enta Baba-God house wit plenty pipo.
  15. Make dem kpeme; make dem bury dem alive, evil dey stay wit dem, and e dey among dem.
  16. As for me, I go call Baba-God, and Baba-God go save me.
  17. Evening, morning and afta-noon—I go pray and cry out, and Baba-God go hear my voice.
  18. He don save my soul in peace f rom di fight wey I dey face—plenty pipo bin dey against me.
  19. Baba-God wey dey since olden day—go hear me, con put kasala for my enemies head—becos dem no gree change, and dem no dey fear Baba-God.
  20. He don use hin hand take change-am-for pipo wey dey live in peace wit am; he don break di promise wey he make.
  21. Hin yarnings smooth pass butter, but na fight full hin mind; hin word soft pass ororo, but he don carry sword.
  22. Carry your load give Baba-God, and he go protect you; he no go ever let good pipo shake.
  23. But you, oh Baba-God, you go bring down di wicked man inside di pit of scata-scata; men wey dey drink blood, and wey dey do mago-mago—no go live reach half of dia life. But as for me, I go trust you.


Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website