Psalm (Pidgin Bible)

Psalm Chapter 57

Abeg click here to share dis post

Baba-God Abeg Epp

  1. To di producer of music. Set di music to, “No Dabaru.” Dis na poem of David—wen he dey run from Saul inside rock. Sorry-for
    me, oh Baba-God, sorry-for me! My soul trust you. And I go hide inside di shadow of your feathers until wahala waka pass.
  2. I cry out to you Baba-God Most High, I cry to Baba-God wey dey do everitin for my life.
  3. He go send from heaven, and he go save me, he dey disgrace di pesin wey wan swallow me. Baba-God go send hin mercy plus truth.
  4. My soul dey for among lions; I dey sleep among men wey dia blood dey hot—men wey get teeth like long-sharp-weapon and arrow, men wey dia tongue sharp like sword.
  5. Oh Baba-God, make you high pass di heavens, make your levels big pass di whole earth.
  6. Dem throw net for my leg; my soul bow down. Dem dig hole for my road—but na dem fall inside di hole.
  7. My heart dey faithful, Oh Baba-God; my heart dey faithful. I go sing—con praise you.
  8. Wake up, my soul! Wake up, harp and lyre! I go wake up di morning.
  9. Oh Baba-God, I go praise you among di Nations; I go sing to you—among di pipo.
  10. Your mercy high reach heaven; your truth reach di clouds.
  11. Oh Baba-God, make your level rise pass heaven; make your levels high pass di earth.


Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website