Ecclesiastes Chapter 4

Abeg click here to share dis post

Di Evil of Oppression

  1. I look again, I con reason all di oppression wey dey happun for di earth: I see as pipo dey cry becos dem dey oppress dem—and dem no get pesin to make dem calm down; pawa dey for di hand of pipo wey dey oppress pipo—and dem no get pesin to calm dem down.
  2. So I praise pipo wey don already kpeme, pass pipo wey dey alive.
  3. But pesin wey dem neva born beta pass dem, pesin wey neva see di evil tins wey pipo dey do for dis world.
  4. I con see sey all di hustle and all di work of talent—dey happun becos man dey jealous hin neighbour (pipo no want make dia neighbour beta pass dem). Dis kain tin sef no-make-sense (na vanity), and e be like sey pesin wan catch breeze.
  5. Mumu pipo dey fold dia hand togeda, con dey chop dia own flesh.
  6. E beta make pesin full one hand wit peace, dan to full two hands wit di wahala of hard work, and to dey pursue breeze.
  7. Again I see sometin wey no-make-sense (vanity) for di earth:
  8. E get one man wey dey alone, he no get any pesin wey dey wit am; he no get son or broda. He always dey work, and hin eyes neva still belleful wit di moni wey he don gada. He con ask hinsef sey, “Who I even dey work for sef, and why I no even dey flex my moni?” Dis kain tin sef no-make-sense (vanity), and na serious wahala.

Di Value of Padi

9. Two beta pass one pesin, becos dem go get beta pay from dia work,

10. Even wen dem fall, one pesin go carry di oda pesin up, but wahala for di pesin wey dey alone, wen he fall and no pesin dey to carry am up.

11. Evensef, if two pipo lie down togeda, dem go warm demsef, but how one pesin go fit warm hinsef.

12. And if one pesin fight am con win am; two pipo go stand am; and rope wey dem make wit three wires no go quick cut.

   Big Name Dey Fade

13. Wise youth wey no get shi-shi—beta pass old mumu king wey no dey gree hear advice.

14. Dat kain youth fit come from prison, con turn to king, even though if na poor man pikin (ajekpako) for inside di kingdom.

15. I see sey all di pipo wey dey alive, wey dey waka under di sun, dey follow di youth wey take-over from di king.

16. Dem no fit count hin followers, but anoda generation go grow, con fashi am sef—dis kain tin no-make-sense (na vanity)—e be like sey pesin wan catch breeze.


Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website