Psalm (Pidgin Bible)

Psalm Chapter 143

Abeg click here to share dis post

Hear My Prayer

  1. Dis na Psalm of David. Oh Baba-God,
    hear my prayers, listen to my cry for mercy; ansa me inside your goodness and faithfulness.
  2. No judge your servant, no-pesin for dis life dey good for your eyes.
  3. Di enemy don show me pepper, he don nack me for ground; he make me stay for darkness like pipo wey don kpeme tey-tey.
  4. So my spirit inside me don taya, and
    palava dey for my heart.
  5. I remember olden days; I dey meditate
    on all your works, and I dey reason everitin wey your hand don make.
  6. I carry my hands give you, my soul wan drink you like dry land wan drink water.
  7. Oh Baba-God, ansa me kiakia, my spirit don dey give up. No hide your face from me, or I go be like those wey dey go down to grave.
  8. Allow me hear your soft-love for
    morning. Na you I dey trust. Show me where you wan make I go, I don carry my soul give you.
  9. Oh Baba-God, save me from my
    enemies, I dey hide my head inside you.
  10. Teach me how to do wetin you wan make I do, na you be my God, your spirit dey good, carry me go ground wey level.
  11. Ginger me, oh Baba-God—becos of
    your name, carry my soul komot from
    inside wahala—becos of your goodness.
  12. Silence all my enemies becos you dey
    sorry-for me. Scata all di pipo wey dey
    wahala my life—becos I be your servant.


Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website