Isaiah

Isaiah Chapter 62

Abeg click here to share dis post

As Zion Go Take Save Plus New Name

  1. Becos of Zion, I no go dey quiet, and becos of Jerusalem—I no go rest until clean-heart start to dey shine, and salvation go be like lamp wey dey burn.
  2. Di nations go see your clean-heart, and all kings go see your levels, and dem go call you new name wey Baba-God mouth go give you.
  3. You go be crown of levels for Baba-God hand.
  4. Dem no go tok sey you be pesin wey dem fashi again, and dem no go tok sey your land na waste again, but dem go call you—‘Hepzi-bah,’ con call your land—‘Beulah’; becos Baba-God dey happy for you, and your land go marry.
  5. As young man take dey marry virgin, naso your sons go marry you; and as man wey wan marry—take dey happy for di woman wey he wan marry, naso body go sweet your God becos of you.
  6. I don set vigilante for your walls, oh Jerusalem. Dem must neva dey silent both for day and night. All of una wey dey pray to Baba-God, make una no keep quiet.
  7. No let Baba-God rest, until he make Jerusalem stand gidigbam, con make am city wey di whole world go praise.
  8. Baba-God don swear wit hin right hand, and wit hin strong hand, “Surely I no go give your corn as food to your enemies again, and di sons of strangers no go drink una wine, and wetin una hustle for.
  9. But di pipo wey gada am nahin go chop am, and dem go praise Baba-God. And di pipo wey don gada am, go drink am inside my holy house.
  10. Pipo of Jerusalem, make una go outside di city and make una build road for una pipo wey dey come back! Build highway; komot di stones for road! Raise up di flag for di pipo to see.
  11. See, Baba-God don send hin message reach di end of di earth, “Tell di daughters of Zion, ‘See, Baba-God dey come save una; see hin reward dey wit am as he dey come.’ ”
  12. And pipo go call dem, “Di holy-pipo, pipo wey Baba-God don save.” Dem go call Jerusalem, “Di City Wey Baba-God Love,”and, “Di City Wey Baba-God No Fashi.”

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website