Jeremiah

Jeremiah Chapter 19

Abeg click here to share dis post

        Di Sign Of Di Jug Wey Break

  1. Na wetin Baba-God tok be dis: “Go buy clay container [bottle] from di artist. Carry some of di senior-men of di pipo, plus senior priests follow-body,
  2. And make una go bottom-of-di-mountain of di son of Hinnom, wey dey for di front of di Potsherd Gate. Na for there you go tok wetin I tell you,
  3. con tok sey, “Hear wetin Baba-God tok, Oh kings of Judah and pipo of Jerusalem. Dis na wetin Baba-God Almighty tok, di God of Israel: Listen, I go make kasala burst for dis place, wey go scratch di ears of any pesin wey hear am;
  4. Becos dem don fashi me and dem don turn dis place to place for foreign gods; dem don burn incense for dis place—to gods wey none of demor dia papa, or even di kings of Judah—bin sabi before, and dem don full dis place wit di blood of innocent pipo.
  5. Dem don build shrines for Baal, to burn dia pikin inside faya as offering to Baal—sometin wey I no tell dem to do, or command dem to do, or wey I reason for my mind.
  6. So make una dey watch, di days dey come, naso Baba-God tok—wen pipo no go call dis place Topheth or di ‘Bottom-of-di mountain of di Son of Hinnom,’ but dem go call am, ‘Bottom-of-di mountain killing.’
  7. “For dis place, I go spoil di plan of Judah plus Jerusalem. I go make dem fall for di sword of dia enemies, dem go fall for di hands of di pipo wey dey fyne dia lives, and I go give dia deadbody as food to di birds wey dey fly for sky, and to di wild animals of di earth.
  8. I go scata dis city, sote pipo go dey yab am; everi pesin wey dey waka pass go shock, and dem go hiss becos of dia wounds.
  9. I go make dem chop dia sons plus daughters, and dem go chop each oda for di kasala, wen di enemies go surround dem—and wit di wahala wey di enemies go cos—wit di pipo wey dey fyne dia lives.’
  10. Naso Baba-God tell me sey make I break di container [bottle] for front of those pipo wey follow me.
  11. And tell dem sey, ‘Na wetin Baba-God Almighty tok be dis: I go break dis nation and dis city like clay pot wey dem no fit join togeda again. Pipo go bury dia dead for Tophet, until space no dey again to bury dem.
  12. Na wetin I go do to dis place, and to those pipo wey dey stay here,’ naso Baba-God tok, ‘I go make dis city be like Topheth until space no dey again.
  13. Dem go spoil di houses for Jerusalem plus all houses of di king of Judah like di place of Topheth—becos of all di houses wey dem burn incense on top of dia roof—to all di stars, moon, and sun, and where dem pour drink offering to dia gods’ ”
  14. So Jeremiah come back from Topheth, where Baba-God send am to prophesy, and he stand for di yard of Baba-God house, con tell all di pipo sey,
  15. “Dis na wetin Baba-God Almighty, di God of Israel tok: ‘Listen! I go bring all di wahala for dis city and all di villages, just as I bin tok against dem, becos dem get coconut-head, and dem no gree listen to my words.’ ”

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website