Jeremiah Chapter 24

Abeg click here to share dis post

Di Good and Bad Figs Fruits

  1. Afta  Nebuchadnezzar wey be di king of Babylon carry Jehoiachin wey be di son of Jehoiachim, wey be di king of Judah and hin officials, di craftsmen, plus di bronze-workers, from Jerusalem—enta Babylon, as prisoners, Baba-God show me two baskets of fig fruits wey dey for front of Baba-God house.
  2. One basket get beta fig fruits like those ones wey quick ripe; di oda basket con get bad fig fruits, dem bad well-well sote pesin no fit chop dem.
  3. So Baba-God ask me sey, “Jeremiah, wetin you dey see so?” I con ansa am, “Na fig fruits, di good ones dey nice well-well, but di bad ones bad well-well sote pesin no fit chop dem.”
  4. Naso Baba-God word con meet me again:
  5. “Dis na wetin Baba-God wey be di Oga of Israel tok: ‘Like all dis beta fig fruits, naso I dey see di pipo wey komot from Judah, wey I pursue from dis place go Babylon—for dia own good.
  6. My eyes go watch dem to do beta tins for dem, and I go carry dem come back to dis land. I go build dem up, and I no go tear dem down; I go plant dem, and I no go uproot dem.
  7. I go give dem heart wey go sabi me—sey na me be Oga. Dem go be my pipo and I go be dia God, becos dem go come back to me wit all dia whole heart.”
  8. Baba-God con tok sey, “But like di fig fruits wey no good, wey bad well-well—sote pesin no fit chop dem, dis na wetin Baba-God tok about dem: ‘Naso I go take deal wit Zedekiah wey be di king of Judah, hin princes, and di pipo wey survive for Jerusalem, whether dem remain for dis land or dem dey live for Egypt.
  9. I go put dem inside wahala for inside all di kingdoms of di earth, to wound dem; so dat dem go be disgrace, pipo go laff dem, and pipo go whyne dem, con curse dem, for all di places wey I scata dem go.
  10. I go send war, hunger, plus disease against dem until dem scata from di land wey I give dem and dia papa-papa-papa.’ ”


Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website