Jeremiah

Jeremiah Chapter 26

Abeg click here to share dis post

Jeremiah Save From Death

  1. Wen Jehoiakim wey be di son of Josiah—first climb di king-chair, naso Baba-God tell me sey,
  2. “Na wetin Baba-God tok be dis: Stand for di yard of my house, con tell all di pipo of di cities of Judah wey dey come worship for Baba-God house. Tell dem everitin wey I yarn you, tok everi word—no komot any single word.
  3. Maybe dem fit listen and all of dem fit komot hand from dia evil ways. Den I go stop, and I no go bring di kasala wey I bin plan for dem, becos of di evil tins wey dem don do.
  4. Tell dem sey, ‘Na wetin Baba-God tok be dis: If una no gree listen to me, con follow my law wey I don set for una,
  5. And if una no gree hear di words of my servants di prophets, wey I dey always send come meet una (even though una no gree listen),
  6. den I go make dis house be like Shiloh, and dis city go be curse among all di nations of di earth.’ ”
  7. Naso di priest, di prophets, plus all di pipo hear Jeremiah dey tok all dis tok for inside Baba-God house.
  8. But as Jeremiah just tell di pipo everitin wey Baba-God tell am to tell dem—naso di priests, di prophets, plus all di pipo hollam, con tok sey, “You must die!
  9. Why you dey prophesy wit Baba-God name sey dis house go be like Shiloh, and sey di city to scata, con empty?” So all di pipo con gada against Jeremiah for inside Baba-God house.
  10. Wen di princes of Judah hear about these tins, dem komot from palace to Baba-God house, con sidon for front of di New Gate for Baba-God house.
  11. So di priest plus di prophets con tell di princes and all di pipo sey, “Dis man suppose die, becos he don prophesy against dis city, and una don hear am wit una own ears!”
  12. Naso Jeremiah tell all di princes, plus all di pipo sey: “Baba-God send me to prophesy against dis house, and dis city—all di tins wey una don hear.
  13. Now make una change una ways, plus everitin wey una dey do, and make una obey Baba-God wey be una Oga. Naso Baba-God go stop, and he no go bring di kasala wey he bin sign against una.
  14. As for me, I dey for una hands; make una do me anytin wey una feel sey e dey good and right.
  15. But make una dey sure sey if una kill me, una go put yawa of innocent blood for una own head and for dis city, wit di pipo wey dey stay inside am; becos na Baba-God true-true send me to come meet una, to tell una all dis tins make una hear.”
  16. So di princes plus all di pipo con tell di priests plus di prophets sey, “Dis man no suppose die– becos he don follow us tok wit di name of Baba-God awa Oga.”
  17. Some of di senior-men for di land con waka go front, naso dem tell everi pesin wey gada sey,
  18. “Micah of Moresheth prophesy for di days of Hezekiah wey be king of Judah. He bin tell all di pipo of Judah, ‘Dis na wetin Baba-God Almighty tok: Dem go dig di mountain of Zion like open farm; Jerusalem go turn to scata-scata! Forest go grow for di mountain where Baba-God house dey.
  19. Abi king Hezekiah wey be king of Judah or any oda pesin kill am? Abi Hezekiah no fear Baba-God con even dey fyne hin favour? Abi Baba-God no stop, sote he no bring di kasala wey he don bin sign against dem? We go soon put serious kasala for awa own head!”
  20. Uriah of Shemaiah from Kiriath Jearim na anoda man wey prophesy wit Baba-God name, he prophesy di same tin against dis city and dis land—as Jeremiah sef prophesy.
  21. Wen king Jehoiakim plus all hin strong men, wit all hin princes hear hin words, di king con dey fyne am to kill am. But Uriah hear about am, fear catch am and he run go Egypt.
  22. But king Jehoiakim send Elnathan wey be di son of Acbor go Egypt, along wit some oda men.
  23. Dem carry Uriah komot from Egypt go meet Jehoiakim, wey kill am wit sword, and dem throway hin deadbody for where dem dey bury ordinary pipo.
  24. Evensef, Ahikam wey be di son of Shaphan support Jeremiah, so dem no carry am give di pipo to kill am.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website