Jeremiah Chapter 27

Abeg click here to share dis post

Judah Go Serve Nebuchadnezzar

  1. Wen Jehoiakim wey be di son of Josiah—wey be king of Judah, first climb di king-chair, dis message come meet Jeremiah from Baba-God.
  2. Dis na wetin Baba-God tell me, “Make wood wey dem dey put for di neck of two malu to drag load for farm, plus chains for yoursef—con tie am for your neck.
  3. Den send message to di king of Edom, Moab, Ammon, Tyre, plus Sidon tru dia messengers wey come Jerusalem to see Zedekiah, di king of Judah.
  4. Send dem message go meet dia oga, ‘Dis na wetin Baba-God Almighty tok, di God of Israel. Tell una oga dis tin:
  5. Wit my ogbonge pawa, and my hand wey stretch out—nahin I take make di earth, di pipo, plus di animals wey dey for ground, and I don give am to any pesin wey I like.
  6. Now I don give all your kontris to my servant, di king Nebuchadnezzar wey be di king of Babylon; I don give am even di animals to serve am sef.
  7. Everi nation go serve him and hin son, and hin pikin-pikin—until di time reach for hin own nation to fall. Naso hin own nation go serve great kings plus nations wey get pawa, and dem go rule Babylon.
  8. And e go happun sey, any nation wey no wan gree serve Nebuchadnezzar wey be di king of Babylon, or bow dia neck under hin load, I go punish dat nation wit sword, hungry plus disease——until I use hin hand take scata am, naso Baba-God tok.
  9. So make una no listen to una prophets, una jazzmen, and di pipo wey dey interprete dream, plus una babalawo wey dey tell una sey, “Una no go serve di king of Babylon.”
  10. Dem dey prophesy lies to una wey go only make una komot far-far from dis land; so dat I go pursue una komot, and una go kpeme.
  11. But di nations wey agree to bow e neck under di load of king Nebuchadnezzar, di king of Babylon, con serve am, I go let dat nation dey for dia own land, to farm for there, and to stay for there—naso Baba-God tok. ”
  12. I give di same message to Zedekiah wey be di king of Judah. I tok sey, “Bow your neck under di king of Babylon. Serve him plus hin pipo and una go live.
  13. Why you and your pipo go die by sword, hunger, plus disease wey Baba-God don threaten any nation wey no go serve di king of Babylon?
  14. Make una no listen to di words of di prophets wey dey tell una sey, ‘Una no go serve di king of Babylon,’ becos dem dey prophesy lies to you.”
  15. Baba-God tok sey, “No be me send dem, dem dey prophesy lies wit my name. So dat I go pursue you komot, and you go kpeme—both you and una prophets wey dey prophesy to una.”
  16. Evensef, I tell di priests plus all dis pipo, sey, “Na wetin Baba-God tok: Make una no listen to di prophets wey dey tok sey, ‘Dem go soon bring those properties wey dem carry komot from Baba-God house go Babylon,’ dem dey prophesy lies to una.
  17. No listen to dem. Serve di king of Babylon, and una go live. Why una wan make dis city scata?
  18. But if dem be true-true prophets, and dem get Baba-God word, make dem beg Baba-God Almighty, make he no let di pipo of Babylon come carry di beta-beta-tins wey remain for Baba-God house and palace of di king of Judah plus Jerusalem.
  19. Becos na wetin Baba-God Almighty tok about di pillars, di bronze basin wey dem dey call ‘Sea’, di basin-stand, plus all di oda properties wey remain for di city,
  20. wey Nebuchadnezzar, di king of Babylon no carry komot wen he carry Jeconiah, di son of Jehoiakim wey be di king of Judah—as prisoner from Jerusalem to Babylon, along wit all di rulers of Judah plus Jerusalem.”
  21. Yes, dis na wetin Baba-God Almighty, di God of Israel tok about di tins wey remain inside Baba-God house and inside di palace of di king of Judah plus Jerusalem:
  22. ‘Dem go carry dem go Babylon, and dem go dey for there until di day wey I go come for dem,’ naso Baba-God tok, ‘Naso I go carry dem come back, con put dem for where dem bin dey befor


Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website