Jeremiah Chapter 29

Abeg click here to share dis post

Di Letter Of Jeremiah To Di Pipo Wey Dem Carry As Prisoner

  1. Now, na dis be di words of di letter wey Jeremiah di prophet send from Jerusalem to di remaining senior-men wey dem carry as prisoner, to di priests, and to di prophets, plus all di pipo wey Nebuchadnezzar carry komot as prisoners from Jerusalem to Babylon;
  2. (Dis tin happun afta dat, Jehoiachin di king, and di queen moda, di palace officials, plus di princes of Judah and Jerusalem, di craftsmen plus all di artists—don komot from Jerusalem as prisoners)
  3. Jeremiah give Elasah wey be di son of Shaphan, and Gemariah wey be di son of Hilkiah, wey Zedekiah di king of Judah send to Nebuchadnezzar for Babylon. E tok sey:
  4. Dis na wetin Baba-God Almighty tok, di God of Israel—to all di pipo wey dem carry as prisoners, to di pipo wey I let dem carry komot from Jerusalem go Babylon:
  5. “Make una build house and make una settle down; plant gardens and chop dia fruits.
  6. Marry and make una get pikin; fyne wife for una sons, and give una daughters for marriage, so demsef fit get pikin. Make una grow for there, and make una no dey small.
  7. Make una pray for di peace of di city sef—wey I don make dem carry una go as prisoners. Pray to Baba-God for di city, becos if di city get peace, unasef go get peace.”
  8. Yes, na wetin Baba-God Almighty tok, di God of Israel: “Make una no let di prophets and babalawo wey dey among una—scam una. Make una no listen to di dreams wey dem get for una.
  9. Dem dey prophesy lies to una wit my name. I no send dem,” naso Baba-God tok.
  10. Dis na wetin Baba-God tok, “Wen seventy years don complete for Babylon, I go come for una, con do my good promise to carry una come back to dis place.
  11. Becos I know di plans wey I get for una”—naso Baba-God tok, “Plans of peace, and no be gbege, and to give una wetin una want las-las.
  12. Naso una go call me, and una go come pray to me, and I go ansa una.
  13. Una go look for me, con see me—wen una fyne me wit una full heart.
  14. Una go see me,” naso Baba-God tok, “I go free una from foreign land—con carry una come back. I go gada una from di nations and from all di place wey I pursue una go,” naso Baba-God tok, “I go carry una come back to di place where I pursue una komot as slave, for foreign land.”
  15. Una fit tok sey, “Baba-God don raise up prophets for us for Babylon,”
  16. But dis na wetin Baba-God tok about di king wey dey sidon for David king-chair, and all di pipo wey remain for dis city—una pipo wey dem no carry go foreign land as prisoners;
  17. Yes, dis na wetin Baba-God Almighty tok: “See, I go send sword, hungry plus disease against dem, and I go make dem be like bad fig fruits—sote pesin no fit chop dem, becos dem be evil.
  18. I go pursue dem wit my sword, hunger, plus disease. I go make dem carry dem go all di nations of di earth. Dem go be curse, pipo go shock for dem,  pipo go hiss for dem, and dem go be disgrace among all di nations  wey I go pursue dem go.
  19. Becos dem no gree hear my word wey I dey send my servants di prophets—to tell dem everi time, and dem no gree listen,” naso Baba-God tok.
  20. So make una hear Baba-God word, una wey be prisoners for foreign land, wey I pursue from Jerusalem go Babylon.
  21. Na wetin Baba-God Almighty tok, di God of Israel, about Ahab wey be di son of Kolaiah, plus Zedekiah wey be di son of Maaseiah, wey dey prophesy lies to una wit my name: “I go carry dem give Nebuchadnezzar wey be di king of Babylon, and he go kill dem for una korokoro eyes.
  22. Becos of dem, all di pipo wey komot from Judah go Babylon go dey use dis curse: ‘Make Baba-God make you be like Zedekiah plus Ahab, wey di king of Babylon roast for faya!’
  23. Becos dem don do bad-bad-tins for Israel; dem don sleep wit dia neighbour wife, and dem don tok lies wit my name—wey I no send dem to do. I know about dis tins and I be witness, naso Baba-God tok.”

Shemaiah Letter Against Jeremiah

24. Tell Shemaiah wey be di Nehelamite sey,

25. “Na wetin Baba-God Almighty tok, di God of Israel: You send letters wit your own name to all di pipo of Jerusalem, to Zephaniah wey be di son of Maaseiah di priest, and to all di oda priests. You tell Zephaniah sey,

26. ‘Baba-God don choose you as priest to take di place of Jehoiada, so dat officers go dey in charge of Baba-God house, to control any madman wey dey reason hinsef as prophet. You must chain am, con lock hin neck wit iron.

27. Why una neva do dis tin to Jeremiah of Anathoth wey don dey tok like prophet to di pipo?

28. Dem must stop am becos he don tell di pipo wey dey for Babylon sey; e go tey wey dem go be prisoners for there, and make dem build houses con settle down, plant garden, con chop wetin dem plant.’ ”

29. Zephaniah di priest read di letter to Jeremiah di prophet.

30. Naso Jeremiah receive message from Baba-God sey:

31. “Send dis message to all di pipo wey dem carry as prisoners: ‘Dis na wetin Baba-God tok about Shemaiah di Nehelamite: Becos Shemaiah don prophesy to una, even though I no send am, and he don make una believe lie,

32. So dis na wetin Baba-God tok: I go surely punish Shemaiah di Nehelamite and hin family. No man go remain among hin pipo, and he no go see di beta tin wey I go do for my pipo, becos he don preach sey make pipo disobey me,’ naso Baba-God tok.”


Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website