Jeremiah Chapter 33

Abeg click here to share dis post

Promise of Peace Plus Prosperity

  1. As Jeremiah still dey for di prison yard, Baba-God follow am tok di second time:
  2. Dis na wetin Baba-God tok, Baba-God wey make di earth, Baba-God wey form am, con stand am gidigbam—na Baba-God be hin name:
  3. “Call me and I go ansa you, and I go show you ogbonge and big tins wey you no sabi before.”
  4. Dis na wetin Baba-God tok, di God of Israel—about di houses wey dey for di city, and about all di  houses of di king of Judah wey dem don scata to get materials to defend di wall against di mountain of attack wey di enemy dey build, plus di enemy sword.
  5. Dem go fight di pipo of Babylon, but dem go full wit deadbody of di men wey I don kill wit my vex, men wey dia wickedness make me throway-face from dis city.
  6. But time dey come wen I go heal my pipo and cure dia wounds, con give dem peace yanfu-yanfu plus truth.
  7. I go carry di pipo of Judah plus Israel come back to di land where enemies catch dem as prisoners, and I go build dem again as dem bin dey before.
  8. I go wash dem from all di bad-bad-tins wey dem don do against me, and I go forgive all dia sins as dem disobey me.
  9. Naso dis city go make pipo respect and praise me wit happiness, for front of all di nations of di earth wey hear about di good tins wey I do for dem; pipo go surprise, and di kain good tin plus beta-beta-tins wey I go give dem go make dem shock.’
  10. Dis na wetin Baba-God tok: “Una dey tok about dis place sey, ‘Na empty land, wey no get men or animals.’ But for di towns of Judah and for di streets of Jerusalem wey pipo bin run from, and where no pesin or animal dey stay—dem go hear voice from there again.
  11. Di sound of happiness plus joy, di voice of man and woman wey wan marry, and di voice of pipo wey dey carry tanks-giving offering come Baba-God house –sey, “Give tanks to Baba-God Almighty, becos Baba-God good; and hin love dey last forever.” Becos I go bring back di pipo wey bin komot from di land as prisoners, con make di kontri beta as e bin dey before,’ naso Baba-God tok.
  12. Dis na wetin Baba-God Almighty tok, “Even though dis land plus all di cities dey empty now, and no human being or animal dey for there—green-land go dey again where pipo go carry dia animals go chop grass, con chill.
  13. For di cities of di mountains, di cities for bottom-of-di-mountain, for di cities of di south, for di land of Benjamin, for di places round Jerusalem, and for di cities of Judah—animals go waka pass there again and dia owners go count dem,” naso Baba-God tok.

Di Agreement Wit David

14. Baba-God tok sey, “Days dey come wen I go do my beta promise wey I make to di house of Israel plus di house of Judah.

15. For those days and for dat time, I go make correct branch grow from David; he go do di right tins and justice for hin land.

16. For those days, Judah go save and Jerusalem go live wit safety. Make dem call her wit dis name: ‘Baba-God awa goodness.’ ”

17. Becos dis na wetin Baba-God tok: “David go always get man wey go sidon for di king-chair of Israel,

18. And di priests wey be Levites go always get man wey go stand for my front to give burnt offerings, to burn seed offerings and to always give me sacrifices.”

19. Naso Baba-God message come meet Jeremiah sey:

20. “Dis na wetin Baba-God tok: ‘If you fit break my agreement wit di day, and my agreement wit di night, so dat day and night no go dey come for di correct time,

21. den my agreement wit David my servant—plus my agreement wit di Levites wey be priest and wey dey serve for my front—fit break, and David no go get pikin-pikin-pikin wey go dey for hin king-chair.

22. As pesin no fit count di stars for heaven and as dem no fit measure di sand-sand wey dey for beach, naso I go make di pikin-pikin-pikin of David my servant brekete, plus di Levites wey dey serve me.’ ”

23. Baba-God meesage still come meet Jeremiah sey:

24. “You neva notice sey dis pipo dey tok sey, ‘Baba-God don fashi di two kingdoms (Judah plus Jerusalem) wey he choose. So dem hate my pipo and dem no count dem as nation again.’ ”

25. Dis na wetin Baba-God tok: ‘If I neva stand my agreement wit day and night, con fix laws for heaven and earth,

26. den I go fashi di pikin-pikin-pikin of Jacob plus David my servant, and I no go choose one of hin sons to rule di pikin-pikin-pikin of Abraham, Isaac, plus Jacob. I go bring back dia blessings and I go sorry-for dem.’ ”


Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website