Jeremiah

Jeremiah Chapter 39

Abeg click here to share dis post

As Jerusalem Take Fall

  1. Naso dem take catch Jerusalem: For di ninth year of Zedekiah wey be di king of Judah, for di tenth month, Nebuchadnezzar wey be di king of Babylon march against Jerusalem wit all hin army, con surround am.
  2. And for di eleventh year of king Zedekiah, for di ninth day of di fourth month, dem break tru di city.
  3. Naso all di princes of di king of Babylon con sidon for di middle of di Gate: Nergal-Sharezer of Samgar, Nebo-Sarsekim wey be chief officer, Nergal-Sharezer wey be high official, plus all di oda princes of di king of Babylon.
  4. Wen Zedekiah wey be di king of Judah plus all di sojas see dem, dem run; dem komot for di city for night tru one road for di king garden, tru di gate wey dey di middle of di walls, dem con dey run go di smooth-land.
  5. But di army of Babylon pursue dem, con overtake Zedekiah for di smooth-land of Jericho. Dem catch am, con carry am go give Nebuchadnezzar wey be di king of Babylon for Riblah, for di land of Hamath, where he judge am.
  6. Di king of Babylon kill di sons of Zedekiah for there, for Zedekiah korokoro eyes, and he still kill all di rulers of Judah.
  7. But he pluck Zedekiah eyes komot, con tie Zedekiah wit chains, to carry am go Babylon.
  8. Di armies of Babylon put faya for di palace and for di houses of di pipo, con break di walls of Jerusalem.
  9. Nebuzaradan wey be di commander of di guard, con catch pipo go Babylon, dis na di pipo wey bin remain for di city, plus di pipo wey go meet am to surrender to am.
  10. But Nebuzaradan wey be di commander of di guard leave some poor pipo, wey no get shi-shi for di land of Judah, he give dem gardens and lands—di same time.

Jeremiah Save

11. Now Nebuchadnezzar wey be di king of Babylon don give orders about Jeremiah tru Nebuzaradan wey be di commander of di guard, sey:

12. Make una carry Jeremiah, con take care of am; no wound am but do anytin wey he ask for.”

13. So Nebuzaradan wey be di commander of di guard send; Nebushazban, Nergal-Sharezer, Rabag, Rab-saris, plus all di oda princes of di king of Babylon;

14. sey make dem go carry Jeremiah come from di yard of di prison. Dem carry am give Gedaliah wey be son of Ahikam, di son of Shaphan—to carry am go back to hin house. So he con dey among hin own pipo.

15. As Jeremiah bin dey for di yard of di prison, message from Baba-God come meet am sey:

16. “Go tell Ebed-melech di Ethiopian, ‘Dis na wetin Baba-God Almighty tok, di God of Israel: I go soon do wetin I tok against dis city—for evil and no be wit beta. For dat time, dem go happun for your eyes.

17. But I go save you on dat day—naso Baba-God tok; I no go carry you give those pipo wey you dey fear.

18. I go save you and you no go fall by sword, but you go escape wit your life, becos you trust me—naso Baba-God tok.’ ”

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website