Jeremiah

Jeremiah Chapter 40

Abeg click here to share dis post

Jeremiah Stay For Judah

  1. Baba-God message come meet Jeremiah afta Nebuzaradan wey be di commander of di guard bin release am for Ramah. He bin see Jeremiah for chain along wit all di prisoners of war from Jerusalem plus Judah—wey dem dey carry as prisoners go Babylon.
  2. Wen di commander of di guard see Jeremiah, he tell am sey, “Na Baba-God wey be your oga nahin put dis kasala for dis place.
  3. And now Baba-God don make am happun; he don do wetin he tok sey he go do. All dis tin happun becos una sin against Baba-God and una no gree obey am.
  4. But today I dey free you from di chains wey dey for your hand. Follow me go Babylon, if you like, I go take care of you; but if you no want, you no need to come. See, di whole kontri dey for your front; go any where wey you like.”
  5. But before Jeremiah turn to komot, Nebuzaradan still tok sey, “Go back to Gedaliah wey be di son of Ahikam, di son of Shaphan, wey di king of Babylon don make as ruler for di cities of Judah, con stay wit am among di pipo, or go any where wey you like.” Naso di commander con give am food and gift, con allow am dey go.
  6. So Jeremiah go meet Gedaliah wey be di son of Ahikiam for Mizpah, and he stay wit am among di pipo wey remain for di land.

Gedaliah Rule For Judah

7. Wen all di army officers plus dia men wey still dey for di open kontri hear sey di king of Babylon don choose Gedaliah wey be son of Ahikiam as govnor for di land, con put am in charge of all di men, women, plus pikin wey poor pass for di land, and wey dem no carry as prisoner go Babylon,

8. Dem con meet Gedaliah for Mizpah—even Ishmael wey be son of Nethaniah, Johanan and Jonason of Tanhumeth, di son of Ephai di Netophathite, plus Jaazaniah di son of Maacathite, and dia men.

9. Gedaliah wey be di son of Ahikam, di son of Shaphan swear to dem and dia men sey, “Make una no fear to serve di pipo of Babylon settle down for di land, con serve di king of Babylon and e go beta for you.

10. Me mysef go stay for Mizpah to represent una for di pipo of Babylon wey come meet us, but make una harvest di wine, di cold-season fruits, plus olive ororo, con store dem put for container, and make una live for di cities wey una don take over.”

11. Wen all di Jews for Moab, Ammon, Edom plus all di oda kontris hear sey di king of Babylon leave some pipo for Judah, and sey he choose Gedaliah wey be di son of Ahikam, di son of Shapan, as govnor over dem,

12. All of dem come back to di land of Judah, dem go meet Gedaliah for Mizpah, from all di kontris wey dem scata put. And dem harvest plenty wine, and fruit for cold season.

Dem Plan Against Gedaliah

13. Johanan wey be di son of Kareah and all di army officers wey still dey for di open kontri come meet Gedaliah for Mizpah.

14. Naso dem tell am sey, “Abi you no know sey Baalis wey be di king of di Ammonite don send Ishmael wey be di son of Nethaniah to kill you?” But Gedaliah wey be son of Ahikam no believe dem.

15. Naso Johanan wey be di son of Kareah con follow Gedaliah tok codedly for Mizpah, “Abeg, make I go kill Ishmael wey be di son of Nethaniah, and no pesin go know. Why he go kill you, con make all di Jews wey gada round you for dis place scata, and di remaining pipo of Judah go con kpeme?”

16. But Gedaliah wey be di son of Ahikam tell Johanan wey be di son of Kareah—sey, “No do dat kain tin! Wetin you dey tok about Ishmael no be true.”

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website