Jeremiah

Jeremiah Chapter 41

Abeg click here to share dis post

Chapter 41

               Dem Kill Gedaliah

  1. E con happun for di seventh month, Ishmael wey be di son of Nathaniah, di son of Elishama, wey get royal blood, and wey be one of di King princes, come wit ten men go meet Gedaliah wey be son of Ahikam for Mizpah. As dem dey chop togeda for there,
  2. Ishmael wey be son of Nathaniah plus di ten men wey dey wit am stand up, con shuuk Gedaliah wey be di son of Ahikam, di son of Shaphan wit sword. Dem kill di pesin wey di king of Babylon choose as govnor for di land.
  3. Ishmael kill all di Jews sef wey bin dey wit Gedaliah for Mizpah, and even di sojas of Babylon wey dey for there.
  4. Di day afta dem kill Gedaliah, before any pesin know about am,
  5. Eighty men wey don shave dia bear-bear, tear dia clothes, con cut demsef—come from Shechem, Siloh, plus Samaria; dem bring offerings and incense for dia hand, come Baba-God house.
  6. Ishmael wey be di son of Nethaniah komot from Mizpah go meet dem, and he dey cry as he dey go. Wen he meet dem, he con tell dem sey, “Make una come meet Gedaliah wey be di son of Ahikam.”
  7. Wen dem enta di city, Ishmael wey be di son of Nethaniah and di men wey dey wit am kill all of dem con throway dem inside pit.
  8. But ten of dem tell Ishmael sey, “No kill us! We get wheat plus barley, ororo plus honey wey we hide for one land.” So he leave dem and he no kill dem wit di odas.
  9. Now, di pit where he throway all di deadbody of di men wey he kill wit Gedaliah, na di pit wey king Asa bin dig as part of hin defense against Baasha wey be di king of Israel. Ishmael wey be di son of Nethaniah full am wit deadbody wey dem kill.
  10. Naso Ishmael catch all di rest pipo wey dey for Mizpah as hin prisoner—even di king daughter, along wit all di odas wey remain for there, wey Nebuzaradan wey be di commander of di guard, put Gedaliah di son of Ahikam in charge of. Ishmael wey be di son of Nethaniah catch dem as hin prisoner con start to dey cross over to di land of Ammon.
  11. But wen Johanan wey be di son of Kareah, and all di army officers wey dey wit am—con hear about all di bad-bad-tins wey Ishmael wey be di son of Nethaniah don do,
  12. Dem carry all dia men, con go fight Ishmael wey be di son of Nethaniah. Dem meet am near di big water near Gibeon.
  13. Wen all di pipo wey Ishmael get wit am see Johanan di son of Kareah plus di army officers wey dey wit am, dem con dey happy.
  14. All di pipo wey Ishmael take as prisoners from Mizpah turn—con go meet Johanan wey be di son of Kareah.
  15. But Ishmael wey be di son of Nethaniah and eight of hin men escape from Johanan, con run enta di kontri of di Ammonites.

Movement To Egypt

16. Naso Johanan wey be di son of Kareah and all di army officers wey dey wit am, con carry all di pipo wey survive from Mizpah, wey he carry from di hands of Ishmael wey be di son of Nethaniah afta he kill Gedaliah di son of Ahikam: di sojas, women, small-small pikin, plus palace officials wey he carry from Gibeon.

17. Naso dem carry-go, dem stop for Kimham near Bethlehem for dia road to Egypt, to escape from di pipo of Babylon. Dem dey fear di pipo of Babylon, becos Ishmael wey be di son of Nethaniah don kill Gedaliah wey be son of Ahikam, wey di king of Babylon bin choose as govnor for di land.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website