Jeremiah Chapter 42

Abeg click here to share dis post

Warning Make Dem No Go Egypt

  1. Naso all di commanders of di armies, plus Johanan wey be son of Kareah, plus Jezaniah wey be son of Hoshaiah, plus all di pipo—both big and small gada near
  2. Jeremiah di prophet con tell am sey, “Abeg hear wetin we dey ask for, con pray to Baba-God for all of us wey remain; becos as you dey see so, we bin first plenty, but na only small pipo remain now.
  3. Pray sey make Baba-God your Oga tell us where we go go and wetin we go do.”
  4. Prophet Jeremiah con tok sey, “I don hear una, I go surely pray to Baba-God una Oga as una don ask me to; I go tell una everitin wey Baba-God tok and I no go hide anytin from una.”
  5. Naso dem tell Jeremiah sey, “Make Baba-God be awa true and faithful witness between us, if we no do everitin wey Baba-God tell you to tell us to do.
  6. Whether e make-sense to us or na evil, we go obey Baba-God awa Oga, wey we dey send you to, so dat e go beta for us wen we go obey di voice of Baba-God awa Oga.”
  7. Ten days lata, Jeremiah receive message from Baba-God.
  8. So he call dem togeda—Johanan wey be di son of Kareah, plus all di commanders of di armies wey dey wit am, wit all di pipo—from di smallest to di biggest.
  9. He con tell dem sey, “Dis na wetin Baba-God una Oga tok, di One wey una send me go meet wit una mata.
  10. ‘If una stay for dis land, I go build una go up and I no go tear una go down; I go plant una, and I no go komot una root, becos I dey feel sad for di kasala wey I don show una.
  11. Make una no fear di king of Babylon, wey una dey fear now,’ naso Baba-God tok, ‘Becos I dey wit una and I go save una, con komot una from hin hands.
  12. I go sorry-for una, so dat he go sorry-for una, con make una go back to una land again.
  13. But if una con dey tok sey, ‘We no go stay for dis land,’ and una con disobey Baba-God una Oga,
  14. And if una tok sey, ‘Lai-lai, we go go stay for Egypt, for where we no go see war, or hear di trumpet (sound of war), or hungry for food,’
  15. Den make una hear Baba-God word, chai, una wey remain from di house of Judah. Dis na wetin Baba-God Almighty tok, di God of Israel: ‘If una really wan go Egypt, and una go settle down for there,
  16. E go con happun sey, di sword wey una dey fear—go meet una for there, and di hunger wey una dey fear go follow una enta Egypt, naso una go kpeme for there.
  17. True-true, all di pipo wey really wan go Egypt to settle down go die by sword, hunger, plus disease; no single one of dem go survive or escape di wahala wey I go carry meet dem.’
  18. Dis na wetin Baba-God Almighty tok, di God of Israel: ‘As my vex and para bin pour on those pipo wey dey stay for Jerusalem, naso I go vex for una wen una go Egypt. Pipo go dey yab una, dem go do una anyhow, dem go condemn una, con laff una; and una no go see dis place again.’
  19. Chai, una wey remain from di house of Judah, Baba-God don yarn una sey, ‘Make una no go Egypt.’ Dey sure of dis tin: I don warn una today
  20. Una deceive unasef wen una send me to Baba-God una Oga con tok sey, ‘Pray to Baba-God awa Oga for us, tell us everitin wey he tok and we go do am.’
  21. So now make una dey sure of dis tin: Una go die by sword, hunger, plus disease for di place wey una wan go settle down.”


Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website