Daniel

Daniel Chapter 4

Abeg click here to share dis post

Di Second Dream

  1. Nebuchadnezzar di king; To all pipo, nations plus men of everi language, wey dey live for inside di world: Make una peace burku well-well!
  2. Body dey sweet me to yarn una about di miracle signs plus wonders wey di Most High God don do for me.
  3. Hin signs na ogbonge! Hin wonders na okokobioko! Hin kingdom dey last forever; and he dey control from generation to generation.
  4. Me, Nebuchadnezzar, I dey rest for house, for my palace, I belleful and I get everitin wey I want.
  5. I dream one dream wey dey make my mind cut. As I dey lie down for my bed, di images and vision wey pass tru my mind make fear dey catch me.
  6. So I tok sey make all di wise men of Babylon gada for my front, to tell me di meaning of di dream.
  7. Wen di jazzmen, pipo wey sabi read stars, di Chaldeans, plus pipo sey sabi do otumorkpor meet me, I tell dem di dream, but dem no fit tell me di meaning.
  8. Las-las Daniel come my front, and I tell am di dream. (Dem dey call am Belteshazzar—dem dey call am di name of my gods, and di Spirit of di Holy God dey inside am.)
  9. I tok sey, “Belteshazzar, chief of di jazzmen, I know sey di spirit of di holy gods dey inside you, and no secret dey too hard for you to understand. Tell me wetin I see for di visions of my dream, con tell me di meaning.
  10. Na dis be di vision wey I see wen I lie down for bed: I look, and for my front, I see one tree for di middle of di land. Di tree tall well-well.
  11. Di tree con dey grow big and strong, sote di tree con dey reach sky; dem fit see di tree for di ends of di earth.
  12. Di leaves of di tree fine well-well, di fruits burku, and food wey reach everi pesin to chop—dey for di tree. Even wild animals dey live under di tree, and birds wey dey fly for air build dia bird-house for di branches; and di tree dey feed everi animal.
  13. As I lie down for my bed, I see for inside di vision, sey one angel dey for my front, holy one, wey dey come down from heaven.
  14. He con tok wit loud voice: ‘Cut di tree come down and make you cut all di branches; komot all di leaves, con scata all di fruits. Make all di animals run komot from under di tree, and make all di birds komot from di branches.
  15. But leave di bottom part of di tree wey remain—for ground wit di roots, con tie am wit iron plus bronze chain, for di soft grass of di field. Make di water for di air wet am, and make e chop among di animals for di bush [grass] of di earth:
  16. Make hin heart change from human being heart, and make he get wild animal heart—for seven years.
  17. Na wetin di angels wey dey watch decide wit di holy ones don—so dat di pipo wey dey alive go sabi sey Baba-God wey be Oga kpatakpata nahin dey rule di world, and he dey give am to any pesin wey he like, and he dey make di simple pipo to rule di world.
  18. “Na di dream wey me, king Nebuchadnezzar dream. Now Belteshazzar, tell me wetin e mean, becos none of di wise men for my kingdom fit tell me di meaning, but you fit, becos di spirit of di holy gods dey for inside you.”

Daniel Explain Di Second Dream

19. Naso Daniel wey dem dey call Belteshazzar con shock for one hour, becos of di meaning of di dream. So di king tok sey, “Belteshazzar, no let di dream or di meaning of di dream make you shock.” Belteshazzar ansa am, con tok sey, “My oga, I wish sey di dream na for your enemies and di meaning na for badbelle pipo.

20. Di tree wey you see, wey grow, con strong; wey high reach sky, and wey di whole earth fit see,

21. wit fine leaves and fruits wey burku, wey dey provide food for everi pesin, and wey dey give shade to di wild animals of di forest, and wey dey give branches for birds wey dey fly for sky, to build dia bird-house—

22. Oh king, na you be dat tree! You don turn to great pesin wey strong; your greatness don grow sote e dey reach sky, and your control reach di far-far parts di earth.

23. “Oh king, you see messenger, one holy angel, wey dey come down from heaven, wey tok sey, “Cut di tree down and make you scata am, but leave di bottom part of di tree wey remain—for ground wit di roots, con tie am wit iron plus bronze chain, for di soft grass of di field. Make di water for di air wet am, and make e chop among di animals for di bush [grass] of di earth—until seven season pass.

24. “Na di meaning be dis, oh king, and na dis be di word wey di Most High don tok against my oga di king.

25. You go komot from your pipo and you go live wit wild animals for forest; you go chop grass like malu, and rain from heaven go beat you, so dat seven years go pass, until you go sabi sey Baba-God wey be Oga kpatakpata, nahin dey rule di world—and he dey give am to any pesin wey he like.

26. Di command to leave di remaining part of di tree plus roots—mean sey your kingdom go come back to you wen you sabi sey heaven nahin dey rule.

27. So oh king, I wan make you hear my advice: stop to dey commit sin and do di right tins; komot hand from wickedness by showing love to poor pipo. E fit be sey naso your blessings go kontinu.”

Di Second Dream Happun

28. All dis tins con happun to king Nebuchadnezzar.

29. Twelve months lata, as di king dey waka on top of di roof of di palace of Babylon,

30. He con tok sey, “Abi no be dis be di ogbonge Babylon wey I build for di house of my kingdom, wit my strong pawa, and for my respect as king?”

31. As di words still dey for hin lips, one voice come from heaven wey tok sey, “Na dis tin Baba-God don tok about you, oh king Nebuchadnezzar: I don komot di kingdom from your hand.

32. You go komot from your pipo, con go live wit wild animals for forest, you go chop grass like malu, so dat seven years go pass, until you go sabi sey Baba-God wey be Oga kpatakpata, nahin dey rule di world—and he dey give am to any pesin wey he like.

33. Sharp-sharp naso di word wey dem tok about Nebuchadnezzar con happun. He komot from hin pipo, con dey chop grass like malu, and rain from heaven beat am—sote hin hair con grow like eagle feathers, and hin nails con be like di sharp-fingers of bird.

Nebuchadnezzar Get Hinsef Again

34. For di end of dat time, me Nebuchadnezzar, I raise my eyes face heaven, and my sense come back to me. I con dey praise di Most High; I respect am, con give am levels—wey dey forever. Hin control don dey since everlasting, and hin kingdom dey last from one generation to anoda generation.

35. All di pipo of di earth na notin. He dey do anytin wey he like among di army of heaven, and among di pipo of di earth. No pesin fit hold hin hand back, or tell am sey: “Wetin you dey do so?”

36. Di same time wey my sense come back to me, nahin my respect and my goodness come back to me, becos of di levels of my kingdom. My advisers and my rulers welcome me, and I sidon for my king-chair again, so I con get more-more levels as king.

37. Now, me Nebuchadnezzar dey cut-cap for di king of heaven, I dey give am respect, plus levels, becos everitin wey he dey do dey right, all hin ways na justice, and he fit humble everi pesin wey dey feel-big.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website