Daniel

Daniel Chapter 5

Abeg click here to share dis post

Di Writing For Wall

  1. King Belshazzar con do serious party for one thousand of hin rulers, and he drink wine wit dem.
  2.  As king Belshazzar dey drink hin wine, he con tell hin servants sey make dem bring di gold plus silver cups wey hin papa king Nebuchadnezzar bin carry from Baba-God house wey dey for Jerusalem, so dat di king and hin rulers, hin wives plus side-chicks fit use dem take drink.
  3. So dem bring di golden cups wey dem move from Baba-God house wey dey for Jerusalem, and di king and hin princes, plus all hin wives and side-chicks—con dey use dem take drink wine.
  4. As dem dey drink di wine, dem con dey praise di gods of gold plus silver, di gods of bronze, iron, wood and stone.
  5. Before you know, one finger of human being hand show, con dey write for di plaster of di wall, near di lampstand for di king palace. Naso di king see di hand as e dey write.
  6. Naso di king face just change, and hin mind con dey worry am, sote di joint for hin hips con turn to water, and hin knees con dey shake—sote dem dey nack demsef.
  7. Naso di king shout sey make dem call di jazzman, pipo wey sabi read stars, plus pipo sey sabi do otumorkpor, he con tell di wise men of Babylon sey, “Any pesin wey fit read dis writing, con tok wetin e mean—go wear purple cloth wit gold chain for hin neck, and I go make am di third highest ruler for my kingdom.”
  8. Naso all di king wise men enta, but dem no fit read di writing, or tell di king wetin di writing mean.
  9. So king Belshazzar con dey fear well-well, and hin face change. Hin rulers con dey surprise.
  10. Wen di queen hear di voice of di king plus di rulers, she enta inside di room of di party, she con tok sey, “Oh king, make you live forever, no let fear catch you! No let your face dey change!
  11. E get one man for inside your kingdom wey get di spirit of di holy gods inside am. For di time of your papa, dem know sey he get-sense and he sabi tins well-well, and he get wisdom like di gods. King Nebuchadnezzar your papa—your papa di king, I sey—he bin choose am as di chief of all jazzmen, pipo wey sabi read stars, plus pipo sey sabi do otumorkpor;
  12. becos Daniel wey di king dey call Belteshazzar—get special skill, he wise and he get understanding, he sabi meaning of dreams plus twist-tok, and he sabi settle mata wey tie-wrapper. Call Daniel and he go tell you di meaning of di writing.”

Daniel Explain Di Writing

13. So dem carry Daniel come meet di king, and di king tell am sey, “Na you be Daniel, one of di foreigners wey my papa di king carry come from Judah?

14. I don hear sey di spirit of di gods dey for inside you, and I hear sey you fit see-far, you sabi tins, and you understand wisdom.

15. Dem don carry di wise men come, wit all di pipo wey sabi read stars, sey make dem read dis writing, con tell me wetin di writing mean, but dem no fit explain am.

16. Now I don hear sey you sabi tok di meaning of tins, and you sabi settle mata wey tie-wrapper. If you fit read dis writing, con tell me wetin e mean, I go make you wear purple cloth, con put gold chain for your neck, and I go make you di third highest ruler inside my kingdom.”

17. So Daniel ansa di king, “You fit keep your gifts for yoursef and make you give di pay to any oda pesin, but I go read di writing for di king, con tell am wetin e mean.

18. “Oh king, di Most High God give your papa Nebuchadnezzar kingdom, greatness, levels, plus respect

19. Becos of di high levels of king wey he give am—all di pipo, and all di nations, plus men of everi language—con dey fear am, and dem dey cut-cap for am. Di king kill any pesin wey he wan kill, and he free those pipo wey he like to free; e promote di pipo wey he like to promote, and he bring down those pipo wey he like to bring down;

20. But wen hin heart con dey buga, and hin heart con dey strong becos he dey feel-big, naso he fall from hin king-chair, and dem carry hin levels komot from am.

21. He komot from hin pipo and he con get di mind of animal; he live wit wild donkeys, con dey chop grass like malu, and di rain from heaven beat am until he sabi sey na Baba-God di most high dey rule di world, and he dey choose any pesin wey he like to rule am.

22. “But you wey be hin son, oh Belshazzar, you neva make your heart calm down, even though you sabi all dis tins.

23. Instead, you don carry yoursef up against Baba-God of heaven. You collect di cups from Baba-God house, you and your rulers, plus your wives, plus your side-chicks—con use dem take drink wine. You praise di gods of silver and gold, di gods of bronze, iron, wood plus stone—wey no fit see or hear or understand. But you no respect Baba-God wey dey hold your life plus all your ways for hin hand.

24. So he send di hand, con write for di wall.

25. Na wetin di hand write be dis: MENE, MENE, TEKEL, UPHARSIN.

26. Na wetin di yarnings mean be dis: MENE: Baba-God don numba di days wey you go dey as king, con end am.

27. TEKEL: Baba-God don weigh you for scale, and your heart no clean.

28. PERES: Your kingdom don divide and Medes and Persians go collect am.”

29. Naso Belshazzar tell hin servants sey make dem wear Daniel purple cloth, wit gold chain for hin neck, and dem make am di third highest ruler for Babylon.

30. Dat very night, dem kill Belshazzar,

 31. and Darius di Midian wey be sixty two years, con take over di kingdom.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website