Ezekiel

Ezekiel Chapter 11

Abeg click here to share dis post

Judgement On Israel Leaders

  1. Naso di Spirit carry me up, con carry me go di gate of Baba-God house wey dey face di east gate. Twenty five men dey for there, for front of di gate, I con see among dem— Jaazaniah wey be di son of Azzur, plus Pelatiah wey be di son of Benaiah—wey be leaders of di pipo.
  2. Baba-God con yarn me sey, “Man pikin, na dis be di men wey dey plan evil, and wey dey give wicked advice for di city.
  3. Dem tok sey, ‘Abi no be di time to build houses be dis? Di city be like pot for cooking, and na we be di meat.’
  4. So make you prophesy against dem; prophesy, oh man pikin.”
  5. Naso Baba-God Spirit con dey on me, he tell me sey make I tok sey: “Dis na wetin Baba-God tok: ‘Pipo of Israel, I sabi wetin una dey tok and wetin una dey plan—I sabi everitin.
  6. You don kill plenty pipo for inside di city, con full di street wit deadbody.
  7. So dis na wetin Baba-God Almighty dey tok: “Di deadbody wey una don throway for there na meat, and dis city na pot, but I go pursue una komot from am.
  8. Una dey fear sword, and na di sword I go bring against una,” naso Baba-God Almighty tok.
  9. “I go pursue una komot from di city, con carry una give foreigners, and I go judge against  una.
  10. Naso dem go kill una wit sword for inside una own kontri, so una go sabi sey na me be Baba-God una Oga.
  11. Dis city no go protect una as pot take dey protect meat inside am, I go punish una any where una dey for inside Israel.
  12. Naso una go sabi sey na me be Baba-God, becos una no gree follow my words, or keep my laws, but una follow di pattern of di nations wey dey around una.”
  13. Now as I dey prophesy, Pelatiah wey be di son of Benaiah die. Naso I fall face down, con dey cry wit loud voice, “Ah, Baba-God Almighty! Abi you go scata di pipo wey remain for Israel kpatakpata?”

Di Promise To Bring Israel Back Again

14. Naso Baba-God word come meet me again sey:

“Man pikin, your brodas—your brodas wey be your blood relatives, plus di whole house of Israel wey una dey togeda for foreign land so—na dem be di pipo, wey di pipo

wey dey stay for Jerusalem now—dey tok about sey, ‘Make una dey far from Baba-God; Baba-God give us dis land as awa property.’

  1. So tok sey, ‘Dis na wetin Baba-God Almighty dey tok: Even though I send dem far-far komot among di nations, con scata dem among di kontris, but for short time, I go be like holy-place for dem for di kontris wey dem don go.’”
  2. “So tok sey: ‘Dis na wetin Baba-God Almighty tok: I go even gada una from di nations, con carry una come back from di kontris where una scata put, and I go give una back di land of Israel again.’
  3. “Dem go come back to di land, con komot all di evil images, and mumu idols from there.
  4. I go give dem one mind, con put new spirit inside dem; I go komot dia heart of stone from dem, con give dem heart of flesh [soft heart wey fit follow me].
  5. So dat dem go follow my words, con keep my laws, and do dem. Naso dem go be my  pipo, and I go be dia God.
  6. But as for those pipo wey dia heart dey follow dia mumu idols plus evil images, I go carry wetin dem do put for dia own head,” naso Baba-God Almighty tok.
  7. Naso di cherubim spread dia feathers wit dia tyres wey dey for dia side, and di levels of  di God of Israel con dey float on top of dem.
  8. Baba-God levels con go up from inside di city, con stand on top of di mountain wey dey for di east side of di city.
  9. Lata, di Spirit carry me go up, con carry me go meet di pipo of Israel wey dem carry go Babylonia (Chaldea)—for di vision wey di Spirit of Baba-God give me. Naso di vision con  fade.
  10. So I tell di pipo of Israel wey be slaves for Babylon—everitin wey Baba-God bin show me.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website