Ezekiel

Ezekiel Chapter 13

Abeg click here to share dis post

Judgement Against Fake Prophets

  1. Word from Baba-God come meet me sey:
  2. “Man pikin, prophesy against di prophets of Israel wey dey prophesy now. Tell di pipo wey dey prophesy from dia own mind sey: ‘Make una hear Baba-God word!’”
  3. Dis na wetin Baba-God Almighty tok: “Wahala for mumu prophets wey dey follow dia own spirit, and wey neva see anytin!
  4. Chai Israel, una prophets be like fox wey dey for inside deserts.
  5. Una neva go di side wey break for di wall, to repair am for di pipo of Israel, so dat e go stand gidigbam for di war, on di day of Baba-God.
  6. Dia visions na scam, and dia prophecies na lie. Dem dey claim sey na me send dem, but no be me send dem, and dem dey hope, con make pipo dey hope sey dia words go happun!
  7. Abi those una visions no be fake, and di prophecies wey una dey tok no be lies, and una tok sey na me send una, but I no send una any message?”
  8. So dis na wetin Baba-God Almighty tok: “Becos una don tok yeye words and lie-lie visions, I dey against una,” naso Baba-God Almighty tok.
  9. I go soon punish di prophets wey dey see fake visions, and wey dey predict tins wey dey make pipo miss-road. Dem no go dey among my pipo for meeting, dem no go write dia names join di pipo of Israel; and dem no go ever come back to di land of Israel. Naso una go sabi sey na me be Baba-God Almighty.
  10. “Becos dem dey carry my pipo waka miss-road, con dey tok sey, “Peace,” wen peace no dey. My pipo don build wall wey no strong wit stones, and di prophets don come cover am wit paint.
  11. So tell those pipo wey dey cover am wit paint, sey dia wall go soon fall yakata. Serious rain go dey, big ice-stones go fall, and strong-breeze go scata am.
  12. Wen di wall fall, abi pipo no go ask una sey, ‘Wetin happun to di paint wey una take cover di wall?’
  13. So dis na wetin Baba-God Almighty dey tok: “I go even scata am wit strong-breeze as I dey vex, and I go send serious rain as I dey vex, wit ice-stone—wey go scata am as I dey vex.
  14. I go tear down di wall wey una cover wit paint—reach ground, sote e foundation go open, and wen e fall, e go crush una. Naso una go sabi sey na me be Baba-God.
  15. Di wall plus all di pipo wey cover am wit paint go see my vex; den I go tell una sey, ‘Di wall no dey again, plus everi pesin wey cover am wit paint,
  16. Along wit those prophets of Israel wey prophesy to Jerusalem and wey see visions of peace for her, wen peace no dey,’” naso Baba-God Almighty tok.
  17. “Now, man pikin, set your face against di women wey dey among una, wey dey prophesy from dia own mind. Prophesy against dem,
  18. con tok sey, ‘Dis na wetin Baba-God Almighty dey tok: “Wahala for di women wey sew otumorkpor for di hands of dia cloth, con make cloths to cover di head of pipo—no mata dia height—to catch di souls of my pipo. Abi you go dey catch my pipo life for inside trap, con keep your own life?
  19. Una no dey show me respect for front of my pipo, becos dem pay una wit small container of barley and tashere bread—to kill pipo wey no suppose die, and to save pipo wey suppose die—by lieing to my pipo wey dey believe una lies?”
  20. ‘So dis na wetin Baba-God di Oga tok: “See, I dey against di jazz wey una don take put pipo for trap like birds. I go tear dem komot from una hand, con free di pipo wey una don put for inside trap like birds.
  21. I go tear di cloth wey una take dey cover pipo head, con save my pipo from una hands, and dem no go fall again as pipo wey una wan catch. Naso una go sabi sey na me be Baba-God.
  22. “Una dey use una lie take make good pipo lose-heart, pipo wey I no wish to make dem sad. Una don support di hand of wicked man so dat he no gree komot hand from hin evil way—to save hin life.
  23. So una no go see fake visions again, or use jazz; becos I go save my pipo from una hand, so dat una go sabi sey na me be Baba-God.”’”

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website