Ezekiel

Ezekiel Chapter 14

Abeg click here to share dis post

aba-God Go Punish Pipo Wey Dey Worship Idols

  1. Some of di senior-men of Israel come meet me, con sidon for my front.
  2. Naso Baba-God word come meet me sey:
  3. “Man pikin, dis men don set up dia idols for inside dia hearts, and dem don put di tins wey go make dem fall inside sin—for front of dia faces. Abi make I let dem ask me question at all?
  4. So tok to dem, and make you tell dem sey, ‘Dis na wetin Baba-God Almighty dey tok: Any pesin from Israel wey put idol for inside hin heart, con put di wicked tin wey go make am fall inside sin—for hin front, and he come meet prophet, me—Baba-God go ansa am based-on di plenty idols wey he get.
  5. I go do dis tin to catch di hearts of di pipo of Israel again, becos dem don fashi me con dey follow dia idols.’
  6. “So tell di pipo of Israel sey, ‘Dis na wetin Baba-God Almighty dey tok: Make una repent! Komot hand from una idols and make una komot hand from all di tufiakwa wey una dey do!
  7. “ ‘Wen any pesin from Israel or any foreigner separate hinsef from me, con build idol for inside hin heart, and he put di tins wey go make am fall enta sin—for hin front, con go meet prophet to ask question from me, me—Baba-God go ansa am by mysef.
  8. I go change-am-for dat pesin, I go make am to be sign plus warning. I go komot am from  among my pipo, so dat una go sabi sey na me be Baba-God.
  9. “If any prophet tok fake prophecy, na becos me Baba-God don confuse dat prophet. I go stretch my hand against am, con scata am komot from my pipo Israel.
  10. Dem go use dia head take carry di punishment of dia sin. I go punish di prophet di same way I go take punish di pipo wey dey fyne dem.
  11. So dat di pipo of Israel no go ever waka komot from me again, and dem no go spoil demsef again wit all dia sins. So dat dem go be my pipo, and I go be dia God,” naso Baba-God Almighty dey tok.’”

Judgement Wey Pesin No Fit Escape

  1. Baba-God word come meet me again, sey:
  1. “Man pikin, if kontri commit sin by doing bad-bad-tins against me, I go stretch my hand against dem, con cut food komot from dia mouth. I go send hunger, con kill di pipo plus dia animals.
  2. Even if dis three men; Noah, Daniel plus Job dey inside am, dem go only fit save demsef wit dia pure-heart,” naso Baba-God Almighty tok.
  3. “Or if I send wild animals to di whole of dat kontri and dem chop di pipo, con make di kontri empty, sote no pesin fit pass there becos of di wild animals,
  4. as surely as I dey live, even if dis three men dey inside dat kontri, dem no go fit even save dia own sons or daughters. Dem go only fit save demsef, but di land go empty,” naso Baba-God Almighty tok.
  5. “Or if I carry sword against dat kontri, con tok sey, ‘Make di sword visit di whole land,’ and I kill di men plus di animals for di land,
  6. as surely as I dey live, even if dis three men dey inside di kontri, dem no go fit save dia own sons or daughters. Na only demsef dem go fit save,” naso Baba-God Almighty tok.
  1. “Or if I send disease enta di land, con pour my vex for di land wit blood, con kill both man plus animals,
  • as surely as I dey live, even if Noah, Daniel plus Job dey inside di land, dem no go fit save dia sons or daughters. Dem go only fit save demsef wit dia pure-heart,” naso Baba- God tok.
  • Dis na wetin Baba-God Almighty dey yarn, “Tokless of how bad e go be, wen I go send my four bad punishment for Jerusalem—war, hunger, wild animals, plus disease—to kill both pipo plus animals?
  • But some pipo go survive am—sons and daughters wey go pass tru am. Dem go come out to meet you (for Babylon), and wen you see as dem dem dey behave and wetin dem dey do, you go dey okay wit di yawa wey I dey bring against Jerusalem—about everitin wey I don bring on dem.

Naso you go sabi sey e get beta reason for everitin wey I do, and you go calm down wen  you see how dem dey behave and wetin dem dey do,” Baba-God Almighty don tok.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website