Ezekiel Chapter 24

Abeg click here to share dis post

Di Pot Wey Dey Boil

  1. For di ninth year, on di tenth month and on di tenth day, message from Baba-God come  meet me again, sey:
  2. “Man pikin, record dis date, becos di king of Babylon don surround Jerusalem today.
  3. Tell dis pipo wey dey turn against me—one parable, con tell dem sey: “Dis na wetin Baba-God Almighty tok: ‘Put pot for faya, con pour some water put inside am.
  4. Put di pieces of meat inside am, all di beta pieces—di leg plus di shoulder. Full am wit di beta bones;
  5. Use only di meat from di finest sheep, and gada faya-wood for under di pot. Make e boil well, and cook di bones wit di meat.”
  6. ‘Becos dis na wetin Baba-God Almighty tok: “Wahala for di city of blood! She be cooking pot wey don rust, wey di rust no fit komot, komot all di pieces of meat wey dey inside am, wit-out making any choice.
  7. Becos her blood dey inside her: She pour am for rock; she no pour am for ground, where dust go cover am;
  8. To ginger vex and revenge; I don pour her blood for rock, so dat e no go cover.”
  9. ‘So dis na wetin Baba-God Almighty tok: “Wahala for di city of bloodshed! Me sef, I go gada di wood make e high.
  10. So gada di wood, con light di faya. Cook di meat well-well, mix di spices well-well, and make di bones burn.
  11. Den make you put di empty pot [Jerusalem] for di charcoal till e hot—sote di bronze [pot] go dey red, so dat di yama-yama for di pot go melt inside am, and so dat di rust of di pot go burn.
  12. She don make me work taya; and her yama-yama [rust] no gree komot from her; so throway am inside faya [her rust no gree burn komot no mata how di faya hot reach].
  13. Jerusalem, your bad ways don spoil you. Even though I bin try to make you pure, but you no gree. You no go pure from your corruption again until I make my vex fall on you.
  14. Me Baba-God, I don yarn; e go happun, and I go do am. I no go hold back; I no go sorry-for pesin, and I no go stop. I go judge una based-on wetin una don do, and una ways,” naso Baba-God Almighty tok.’ ”

Ezekiel Wife Kpeme

  1. Evensef Baba-God word come meet me, sey:
  2. “Man pikin, see, I wan use one blow take komot wetin you like well-well, but you must no show any sign of sorrow becos she die. No cry, make water no dey for your eyes.
  3. Cry small-small; no cry for di dead. Cover your head, con wear your sandals as sign of  mourning. No cover your face or chop food wey pipo wey dey mourn dey chop.”
  4. So I follow di pipo tok for morning, but for evening, naso my wife die. Di next morning, I do wetin Baba-God tell me to do.
  5. Naso di pipo ask me sey, “Wetin all dis tins mean? Wetin you dey try to tell us?”
  6. So I tell dem sey, “Baba-God word come meet me, sey:
  7. ‘Tell di pipo of Israel sey, “Dis na wetin Baba-God Almighty tok: See, I go spoil my holy- place—di pawa wey una take dey use make-mouth, wey fine for una eyes, and di tin wey una soul love. Di sons and daughters wey una leave [for Jeruslem] go fall by sword.
  8. Den una go do wetin I do. Una no go cover una lips or chop di food wey pipo wey dey cry for dead pesin dey chop.
  9. Make una cover una head, and make una no komot una sandals. Una no go mourn or cry, but una go waste komot becos of una sins, and everi one of una go make sound of pain among unasef.”
  10. Ezekiel go be sign to una; una go do wetin he don do. Wen dis tin happun, una go sabi sey na me be Baba-God Almighty.’”
  11. ‘And you, man pikin, on di day wen I go take dia strong-house, dia happiness plus dia levels, di tin wey fine for dia eyes, wetin dia heart wish for, and dia sons plus dia daughters sef—
  12. On dat day, one pesin wey survive from Jerusalem go come meet you for Babylon, con tell you wetin happun.
  13. Dat time, your mouth go open to tok to di pesin wey escape—and you no go dey silent again. So you go be sign to dem, and dem go sabi sey na me be Baba-God.’”


Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website