Ezekiel Chapter 26

Abeg click here to share dis post

Prophecy Against Tyre

  1. E con happun sey, for di eleventh year, on di first day of di month, Baba-God word come meet me, sey:
  2. “Man pikin, becos Tyre don tell Jerusalem sey, ‘Ntoor! Di gate of di nations don break, and e door don open down for me; now wey she don scata kpatakpata for ground, I go prosper,’
  3. “So dis na wetin Baba-God Almighty tok: ‘See, I dey against you Tyre, and I go make plenty nations raise against you as di waves of big-river take dey raise.
  4. Dem go scata di walls of Tyre, con break her tall-houses; naso I go komot all di soil, con make her be like ordinary rock!
  5. E go be place where dem dey spread fish-net for middle of big-river: me, Baba-God Almighty don tok am,’ naso Baba-God yarn; ‘Di nations go rob her,
  6. And her daughters wey dey for field go die by sword. Naso dem go sabi sey na me be Baba-God.’
  7. Becos dis na wetin Baba-God Almighty tok: “I go allow Nebuchadnezzar wey be di king of Babylon attack Tyre, Nebuchadnezzar wey be di king of kings, wit plenty-plenty horse, plus horse-moto, wit men wey dey ride horse, and big army from di north.
  8. He go use sword take scata your daughter villages wey dey inside you; he go build wall against you, he go build mountain of attack against your wall, con rasie hin shield against you.
  9. He go set war machine to scata your wall, con use hin axes take break your tall-houses.
  10. Hin horse go plenty well-well sote dia dust go cover you. Your walls go shake wen dem hear di noise of di horse-riders, plus di tires, and di horse-moto—as dem dey enta una gates—like men wey dey enta city wey di wall don break.
  11. Di legs of di horses go march down all una streets: dem go kill di pipo wit sword, and una strong pillars go fall yakata for ground.
  12. Dem go tiff una beta-beta-tins, con rob una market; dem go break una walls, con dabaru una fine-fine houses, and dem go throway una stones, woods, plus dust, for inside water.
  13. I go end di sound of una songs, and dem no go hear di music of una strings again.
  14. I go make una turn to ordinary stone, and una go turn to place wey fishermen dey spread nets. Dem no go build una again, becos me Baba-God—I don yarn,’ naso Baba-God Almighty tok.
  15. “Dis na wetin Baba-God Almighty tell Tyre: ‘Abi di islands no go shake for di sound wen  una fall, wen di pipo wey wound dey cry and di killing dey happun inside you?
  16. Naso all di princes of di big-river go step down from dia king-chair, dem go throway dia clothes, con komot dia designer cloth. Fear go be like cloth for dia body. Dem go sidon for ground con dey shake everi time, dem go shock becos of wetin happun to you.
  17. Naso dem go cry for you, con dey sing burial song: “See as dem don scata you,  you wey plenty sailors bin dey, oh city wit big-name, wey dey rule di water wit pawa, she plus her pipo, make fear catch all di pipo wey dey live around there!
  18. Now di islands go shock on di day wen una go fall; yes, di island for water go shake wen una fall yakata.”’
  19. “Dis na wetin Baba-God Almighty tok: ‘Wen I go turn una to empty city, like cities wey pipo don run komot from, and wen I cover una wit water from di big-river, and e plenty- plenty water cover una,
  20. wen I go carry una come down wit those pipo wey dey go down to grave, to di pipo of olden days, con make una stay for under di earth, among places wey don scata since olden days, wit those wey dey go down to pit, and una no go get any place of levels for di land of di living;
  21. I go make una end wit gbege, and una no go dey again. Dem go fyne una, but dem no go see una again,’ naso Baba-God Almighty tok.”


Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website