Ezekiel

Ezekiel Chapter 30

Abeg click here to share dis post

Egypt

  1. Baba-God word come meet me again, sey:
  2. “Man pikin, prophesy, con tok sey: ‘Dis na wetin Baba-God Almighty tok: “Make una cry, ‘Wahala for dat day!’
  3. Becos di day of Baba-God don near, di day of Baba-God dey come—na day of clouds, time for kasala for di nations.
  4. Sword go attack Egypt, and pain go dey for Ethiopia, wen dem kill di pipo for Egypt, con carry her beta-beta tins komot, and dem go tear her foundations for ground.
  5. Ethiopia and Libya, Lydia, all di mix pipo, Chub, plus di pipo of di land of agreement (di Jews wey be refugees for Egypt) go fall by sword along wit di pipo of Egypt.
  6. ‘Dis na wetin Baba-God tok: “Those pipo wey support Egypt go fall, and her pawa wey she take dey feel-big—go fail. From Migdol go reach Synee, those wey dey for there go fall by sword,” naso Baba-God Almighty tok.
  7. “Egypt go empty—among kontris wey don scata and empty, and her cities go turn to scata-scata among cities wey don scata.
  8. Dem go know sey na me be Baba-God, wen I put faya for Egypt, and wen all di pipo wey dey epp her don scata.
  9. On dat day, messengers go go out from me inside ships to make Sudan fear as dem dey chill—di pipo of Sudan (Ethiopia) go shock as on di day wen kasala go burst for Egypt, dat day dey true-true come!”
  10. ‘Dis na wetin Baba-God Almighty tok: “I go use di hand of Nebuchadnezzar wey be di king of Babylon—take end di plenty pipo plus beta-beta-tins of Egypt.
  11. Him and hin army, di most wicked nation—go come scata di land. Dem go carry dia sword to attack Egypt, con full di land wit deadbody.
  12. I go make di rivers of di Nile dry, con sell di land to evil men; I go use di hand of foreigners take turn di land to waste plus everitin wey dey inside am. Me Baba-God don yarn.”
  13. ‘Dis na wetin Baba-God Almighty tok: “I go dabaru [scata] di idols, con end di images for Memphis. Princes no go dey inside Egypt again, and I go spread fear all over di land.
  14. I go turn Pathros to waste, I go set faya put for Zoan, con punish Thebes.
  15. I go pour my vex on Sin, wey be di pawa of Egypt, con cut di plenty pipo of Thebes komot.
  16. I go put faya for Egypt, dem go tear Sin [Thebes] open, and Memphis go face wahala everi day.
  17. Di young men of Aven plus Pibeseth go fall by sword, and enemies go carry di cities komot as prisoners.
  18. Dat day go turn to darkness for Tahpanhes wen I break di pawa of Egypt; na for there her pawa wey she take dey feel-big—go end. Clouds go cover Egypt, and dem go catch her pipo as prisoners.
  19. Naso I go judge Egypt, and dem go sabi sey na me be Baba-God.”’”

Pharaoh Pawa Don Break

20. E con happun sey, on di eleventh year, for di first month and on di seventh day, message from Baba-God come meet me, sey:

21. “Man pikin, I don break di hand of Pharaoh wey be di king of Egypt, and dem neva tie am so dat e go heal, or wrap am wit bandage so dat e go fit strong to carry sword.

22. So dis na wetin Baba-God Almighty tok: ‘I dey against Pharaoh wey be di king of Egypt. I go break hin two hands, both di one wey good plus di one wey don break, con make hin sword fall from hin hand.

23. I go scata di Egyptians among di nations, con scata dem for di whole kontris.

24. I go give pawa to di hands of di king of Babylon [Nebuchadnezzar], con put my sword for hin hand, but I go  break Pharaoh hands, and he go cry for hin front like man wey get serious wound.

25. I go give pawa to di hands of di king of Babylon, but Pharaoh hands no go strong, and e go fall. Naso dem go take sabi sey na me be Baba-God, wen I put my sword for di hand of di king of Babylon and he go stretch am against Egypt.

26. I go scata di Egyptians among di nations, con pursue dem among di kontris. Naso dem go sabi sey na me be Baba-God.’”

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website