Ezekiel Chapter 29

Abeg click here to share dis post

Prophecy Against Egypt

  1. For di tenth year, for di tenth month, on di twelfth day, message from Baba-God come meet me, sey:
  2. “Man pikin, set your face against Pharaoh wey be di king of Egypt, con prophesy against am and against all Egypt.
  3. Tell am sey: “Dis na wetin Baba-God Almighty tok: ‘See, I dey against you, Pharaoh wey be king of Egypt, di ogbonge dragon wey dey lie down for e rivers. You tok sey, “Na me get di Nile; I make am for mysef.”
  4. But I go put hooks for your jaws, con make di fish wey dey inside your rivers gum your fish-skin. I go komot you from your rivers, and all di fish wey dey inside your river go gum join your fish-skin.
  5. I go throway you for inside desert, you plus all di fish wey dey inside your rivers. You go fall for open field, and no pesin go gada you or pick you. I go give you as food to di wild animals of di land and di birds wey dey fly for sky.
  6. Den all di pipo wey dey stay for inside Egypt go sabi sey na me be Baba-God, becos di pipo of Israel bin depend on una for support, but una just be like walking-stick wey no- strong [walking-stick wey dem make wit reed].
  7. Naso you break wen dem hold you, and you break, con tear dia shoulder, and wen dem rest on you, you break, con make dem get back pain.”
  8. ‘So dis na wetin Baba-God Almighty tok: “I go surely bring sword against una, con kill both men plus animals.
  9. Egypt go turn to empty waste land. Naso una go sabi sey na me be Baba-God; becos you tok sey, ‘Na me get River Nile; na me make am.’
  10. So I dey against you plus your rivers, and I go make di land of Egypt turn to scata-scata, and empty waste land—from Migdol go reach Syene, far-far go reach di border of Ethiopia.
  11. No leg of man or animal go pass there; and no pesin go stay there for forty years.
  12. I go make di land of Egypt empty among desert land, and her cities go dey among cities wey don turn to waste, and Egypt go empty for forty years; naso I go scata di Egyptians among di nations, con pursue dem go many kontris.”
  13. ‘But dis na wetin Baba-God Almighty tok: “Wen di forty years end, I go gada di Egyptians from di nations where dem scata put,
  14. I go bring dem back from di land wey dem be prisoners, con carry dem go back to Pathros, di land where dem come from. And dem go be low-key nation.
  15. E go be di lowest among all di nations, and wey no go fit raise pass oda nations: becos I go bring dem down—sote dem no go fit rule nations again.
  16. Den Israel no go trust Egypt for epp again. Di way Egypt take scata go make Israel remember how bad dia sin be becos dem bin turn follow Egypt. Naso Israel go sabi sey na me be Baba-God.”’”




Nebuchadnezzar Go Win Egypt

  1. E con happun sey, for di twenty seventh year [as Jehoiachin be prisoner], for di first month, for di first day of di month, Baba-God word come meet me, sey:
  2. “Man pikin, Nebuchadnezzar di king of Babylon don make hin army work well-well to fight against Tyre—sote everi head turn to gorimakpa and everi shoulder peel, but him plus hin army no gain anytin from Tyre wit di kain energy wey dem spend for there against Tyre [becos dem still no fit win dem].
  3. So dis na wetin Baba-God Almighty tok: ‘I go surely give Egypt to Nebuchanezzar wey be di king of Babylon, and he go carry all dia beta-beta-tins komot. He go obtain, con rob di land as pay for hin army.
  4. I don give am di land of Egypt as hin pay for hin work, becos he work for me,’ naso Baba-God Almighty tok.
  5. “On dat,day I go make horn grow for di house of Israel, and I go open your mouth to tok among dem. Naso dem go sabi sey na me be Baba-God.’”


Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website