Ezekiel Chapter 38

Abeg click here to share dis post
  1. Baba-God message come meet me, sey:
  2. “Man pikin, set your face against Gog, di land of Magog, di chief prince of Meshech plus Tubal; prophesy against am,
  3. con tok sey: ‘Dis na wetin Baba-God Almighty tok: “Chai Gog, See, I dey against you, di chief prince of Meshech plus Tubal,
  4. I go turn you round, I go put hook for your jaws, con carry you come out wit your whole army; your horses, your horsemen—and all of dem dey wear different-different kind of weapon, plus plenty-plenty army wit big and small shield, and all of dem dey handle swords:
  5. Persia, Ethiopia, plus Lybia go dey wit dem, all of dem wit shields plus helmets,
  6. Plus Gomer wit all her sojas, and di house of Togarmah from di north side—wit all her  sojas—and many nations wit you.
  7. “Make you ready, prepare; you plus all di plenty-plenty pipo wey gada round you, and make you   guard dem.
  8. E go tey but I go call you. Many years from now you go enta di land of Israel—wey go dey enjoy peace afta dem don recover from war, and afta e pipo don come back from plenty kontis—to di mountains of Israel.
  9. You plus all your sojas, plus plenty-plenty pipo [nations] wey dey wit you—go go up, una go carry-go like strong-breeze; una go be like cloud wey dey cover di land.”
  10. ‘Dis na wetin Baba-God Almighty tok: “On dat day e go happun sey, sometin go enta inside your mind, and you go reason bad plan:
  11. And you go tok sey, ‘I go attack di land of villages wey no get wall; I go attack pipo wey dey  live wit peace and wey no get wahala, pipo wey no get fence, thick-iron, or gates—
  12. to obtain dia properties, con rob dem, con turn my hand against di pipo wey don settle down among di place wey bin turn to waste, and against di pipo wey gada from among di nations, wey get plenty animals and properties, wey dey stay for di center of di land.
  13. Sheba plus Dedan, wit di market-pipo of Tarshish, and all her villages (young lions) go tell you sey, “Una don come to rob? Una don gada una plenty sojas to tiff, to carry silver plus gold komot, to carry malu, plus market, con sieze plenty properties?’”’
  14. “So man pikin, prophesy and make you tell Gog sey: ‘Dis na wetin Baba-God Almighty tok: “On dat day, wen my pipo Israel dey live in safety, abi you no go notice am?
  15. You go come from your place from di north side, you plus plenty nations wey dey wit you, all of dem go dey ride horse, plenty sojas, and strong army.
  16. You go move against my pipo Israel, like cloud wey dey cover di land. E go happun lata-lata, I go make you move against my land, so dat di nations go know me, oh Gog, wen I show mysef sey I dey holy tru you—as dem dey see.”
  17. Dis na wetin Baba-God Almighty tok: “No be you I bin tok about before-before by my servants wey be di prophet of Israel, wey prophesy in those days, for many years, sey I go carry you against dem?”
  18. “And e go happun sey on di same day, wen Gog attack di land of Israel, my hot vex go ginger for my face,” naso Oga Baba-God tok.
  19. “Inside my jealousy and my vex like faya nahin I take yarn, surely di land of Israel go shake seriously (earthquake) dat day,
  20. Di fishes for river, di birds for sky, di animals of di land, everi animal wey dey creep for ground, plus all di pipo wey dey for di earth—go shake for my front. Di mountains go fall for ground, di straight high rock go fall, and everi wall go fall yakata for ground.
  21. I go call sword against Gog for all my mountains,” naso Baba-God Almighty tok, “Everi man sword go dey against hin broda.
  22. I go judge am wit disease plus bloodshed; I go pour heavy rain come down, ice-stone, plus sulfur wey dey burn—on am plus hin sojas, wit di plenty nations wey dey wit am.
  23. Naso I go take show my levels, and my holiness, and I go show mysef for front of plenty nations. Naso dem go sabi sey na me be Baba-God.”’


Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website