Ezekiel

Ezekiel Chapter 40

Abeg click here to share dis post

New City plus New House For Baba-God

  1. On di twenty-fifth year as we komot go foreign land, for di starting of di first year, on di tenth month, for di fourteenth year afta di city fall—on dat same day wen Baba-God hand dey on me and he carry me go there.
  2. Inside Baba-God visions, he carry me go di land of Israel, con put me for one high mountain wey dey di south side, e get some buildings wey be like city.
  3. He carry me go there, and I see one man wey be like bronze; he dey stand for di doormot of di gate wit one linen rope, and stick for measurement dey for hin hand.
  4. Naso di man tell me sey, “Man pikin, look wit your eyes, hear wit your ears, con put your mind for everitin wey I go show you, nahin make I carry you come here so—to show you dis tins. Tell di pipo of Israel everitin wey you see.”
  5. I con see one wall wey surround di area of Baba-God house kpatakpata. Di man con carry ruler for measurement wey long reach 10 ½ feet, and he measure di wall. Di wall thick reach 10 ½ feet, con high reach 10 ½ feet.

Di East Gate Of Baba-God House

6. Naso he go di gate wey dey face di east. He climb di steps, con measure di doormot of di gate; e wide reach 10 ½ feet, and di oda doormot (of di gate wey dey inside di thick wall) wide reach 10 ½ feet sef.

7. Everi guardroom long reach 10½ feet, con wide reach 10½ feet. Space of 8 feet dey between di gaurdrooms, and di walls wey dey between dem thick reach eight feet. Di doormot of di gate wey dey near di room wey dem take dey enta, from di inside gate—long reach 10½ feet.

8. He still measure di room wey dem take dey enta di inside gate, na 10 ½ feet.

9. He measure di room wey dem take dey enta di gate, e thick reach 3 and half feet. Dis room wey  dem take dey enta di gate—dey face Baba-house.

10. E get three side rooms for di two-two side of di east gate. Di three of dem na di same size. And di pillars of di door na di same size for di two-two sides.

11. Di man measure di doormot of di gate wey wide reach 17 ½ feet, con long reach 22 ¾ feet.

12. Small wall dey for front of di rooms of di gate, wey high reach 21 inches. Di rooms na 10½ feet for everi side of di square.

13. He con measure di doormot from di roof of one room for di side—to di roof of anoda one, and e wide reach 43 ¾ feet—as door dey face door.

14. He measure di side pillars of di gate, wey high reach 105 feet, and di gate stretch around go reach di side pillars of di yard.

15. From di front of di door wey dem take dey enta—go reach front of di room wey dem take dey enta di inside gate na 87 ½.

16. Thin windows dey for di outside walls of all di rooms, and for di walls wey dey for inside between di rooms. Windows sef dey for di room wey dem take dey enta. Dem carve palm trees for di walls wey dey for inside—wey face di passage.

Di Yard Wey Dey For Outside

17. Naso he carry me come di outside yard, and see rooms and pavement dey round di yard, thirty rooms dey for di pavement.

18. And di pavement dey di side of di gates, and e long like di gates; dis na di low pavement.

19. Naso he measure di wideness from front of di low gate—go reach di outside of di yard wey dey for inside—di space na 175 feet for di east side and for di north.

Di Gate For Di North Side

20. He con measure di wideness and longness of di north gate wey dey lead to di yard wey dey for outside, wey dey face di north.

21. And di rooms for di gate na 3 for dis side, and 3 for di oda side. Di pillars for di side plus di room wey dem take dey enta am—na di same size like those wey dey for di first gate. E long reach 87 ½ feet, con wide reach 43 ¾ feet.

22. Dia windows, di room to enta, plus di palm trees—get di same measurement wit di ones wey dey for di gate wey dey face di east side. Na seven steps dem dey climb am and di room wey dem take dey enta dem—dey for dia front.

23. Di gate for di yard wey dey for inside—dey opposite di north gate, just as e be for di east side. He measure from one gate to anoda gate; na 175 feet.

Di Gate For Di South Side

24. Naso he carry me go di south side and I see di south gate. And he measure di side pillars plus di room wey dem take dey enta, and dem be di same like di odas.

25. Both di room wey dem take dey enta plus di gate—get windows round dem like those oda windows; e long reach 87 ½ feet, con wide reach 43 ¾ feet.

26. Na seven steps dem take dey climb am, and di room wey dem take dey enta am dey opposite dem. Dem carve palm tree for di side pillars—one for dis side, and one for di oda side.

27. Di inside yard sef get gate wey dey face di south side, and he measure from dis gate—to di gate wey dey for outside—for di south side; na 175 feet.

Di Gate Of Di Yard Wey Dey For Inside

28. He con carry me enta di inside yard, tru di south gate; and he measure di south gate. Na di same size wit di odas.

29. Di guardrooms, di side pillars, plus di room wey dem take dey enta di gate, get di same measurement wit di odas. Both di gate, plus di room wey dem take dey enta am—get windows. E long reach 87 ½ feet, con wide reach 43 ¾ feet.

30. Di room wey dem take dey enta di passage wey dey lead to di yard wey dey for inside—long reach 14 feet, con wide reach 43 ¾ feet.

31. Di room wey dem take dey enta di south gate face di outside yard. Design of palm trees dey for di pillars, and na six steps dem take dey climb am.

32. Naso he carry me enta di inside yard for di east side, and he measure di gate. Na di same size wit di odas.

33. Di guardrooms, di pillars, and di room wey dem take dey enta—get di same measurement wit di odas. Di guardrooms plus di room wey dem take dey enta am get windows, and di gate long reach 84 feet, con wide reach 42 feet.

34. Di room wey dem take dey enta—face di yard for outside, and dem design di side pillars wit palm trees, for dis side and for di oda side. Na eight steps dem take dey climb di gate.

35. Naso he carry me come di north gate, con measure am. E get di same measurement wit di odas—

36. wit di guardrooms, di side pillars, and di room wey dem take dey enta am. And e get windows round am. E long reach 87 ½ feet, con wide reach 43 ¾ feet.

37. E pillars face di yard wey dey for outside; and dem get design of palm trees for di side pillars, one for dis side, and one for di oda side. Na eight steps dem take dey climb dis gate.

Di Place Where Dem Take Dey Arrange Sacrifice

38. E get one room and e door—wey dey near di side pillars of di gates; na for there dem dey wash di burnt offering.

39. For di room wey dem take dey enta, four tables dey for there, two for di two-two sides of di room. Na for dis table dem take dey kill di animals for di burnt offering, sin offering, plus guilty offering.

40. For outside wall of di room wey dem dey use take enta, for di two sides of di steps of di north gate, two-two tables dey for there.

41. Na four tables dey for one side of di gate, and four for di oda side—so all of dem na eight tables—and na on top of  dem—dem take dey kill di sacrifices.

42. Four tables still dey wey dem make wit stones wey dem cut—na on top of dem—dem arrange di burnt offering. Everi single one of di table na 31 ½ inches square, and e con high reach 21 inches. Na on dis table dem dey put di instruments for killing di animal of di burnt offerings, plus di sacrifices.

43. Hooks dey wey long reach 3 inches, and dem hang dem round di walls. Di tables na for di meat of di offerings.

Di Room For Di Singers Plus Priests

44. And outside di gate wey dey for inside nahin two rooms dey for di singers—for di yard wey dey for inside, one dey near di side of di north gate, con dey face di south; and di oda one dey near di south gate—con dey face di north.

45. He con tell me sey, “Di room wey dey face di south na for di priests wey dey take care of Baba-God house.

46. Di room wey dey face di north na for di priests wey dey take care of di altar. Na dem be di sons of Zadok, wey be di only Levites wey fit near Baba-God, con serve for hin front.”

Di Measurement Of Di Yard Wey Dey For Inside, Plus Di Room Wey Dem Take Dey Enta

47. Naso he measure di yard, and na foursquare. E long reach 175 feet, con wide reach 175 feet. And di altar dey for front of Baba-God house.

48. He con carry me go di room wey dem take dey enta Baba-God house. He measure di side pillars for front of di room wey dem take dey enta Baba-God house. Dem thick reach 8 ¾ feet for one side and di same for di oda side. Di gate wide reach 24 ½ feet, and di walls wey dey for di sides—long reach 5 ¼ feet for di two-two sides.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website