Ezekiel

Ezekiel Chapter 6

Abeg click here to share dis post

Prophecy Against Di Mountains of Israel

  1. Message from Baba-God come meet me sey:
  2. “Man pikin, set face against di mountains of Israel; prophesy against dem,
  3. And make you tok sey: “Chai mountains of Israel, hear di word of Baba-God di Oga. Dis na wetin di Almighty God dey tell di mountains plus di hills, di rivers, and bottom-of- di-mountains: ‘I go soon carry war come meet una, and I go scata una shines [where una dey worship una idols].
  4. Una altars go scata to pieces, and una images go break; I go kill una pipo for front of una idols.
  5. I go lay di deadbody of di pipo of Israel—for front of dia idols, con scata una bones around di altars.
  6. Any where wey una dey live, di cities go turn to waste, una shrines [where una dey worship una idols] go scata. Una altars go break, dem go break una idols, dem go scata una images, and dem go scata all di works wey una don do.
  7. Dem go kill una pipo among una, and una go know sey na me be Baba-God.
  8. “But I go save some, becos some of una go escape sword wen una run go abroad and di  nations wey dey around una.
  9. Den inside di nations where dem catch una go, those pipo wey escape go remember me—how I take vex for dia ashawo hearts—wey don turn komot from my side, and dia eyes wey dey shuuk to follow dia idols like ashawo. Naso dem go hate demsef las-las— becos of all di evil wey dem don do inside all dia tufiakwa.
  10. And dem go sabi sey na me be Baba-God, I no just dey threaten dem in vain to bring kasala on dem.
  11. ‘Dis na wetin Baba-God di Oga tok: “Nack your hand togeda and nack your leg for ground, and cry out becos of all di evil tufiakwa sins wey di pipo of Israel don commit; becos na war, hunger plus disease go kill dem.
  12. Disease go strike down all those pipo wey be prisoners for far-far land. War go scata those pipo wey dey near. Naso hunger go kill any pesin wey survive and wey remain. So I go take vex for dem finish.
  13. Naso dem go sabi sey na me be Baba-God, wen di deadbody of dia pipo dey among dia idols wey dey around dia altars, for everi high hill and on top of everi mountain, under everi green  tree, and under everi thick oak tree—for di places wey dem dey give sacrifices of sweet scent to all dia idols.
  14. So I go stretch out my hand against dem, con turn dia land to empty place. E go empty pass di desert of Diblah—for any where wey dem dey stay. Naso dem go sabi sey na me be Baba-God.’ ”

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website