Jeremiah

Jeremiah Chapter 52

Abeg click here to share dis post

As Jerusalem Take Fall

  1. Zedekiah na twenty-one years old wen dem crown am as king, and he be king for Jerusalem for eleven years. Hin mama name na Hamutal daughter of Jeremiah, wey be from Libnah.
  2. He do evil tins for Baba-God eyes, just as Jehoiakim sef bin do.
  3. Becos Baba-God dey vex nahin all dis tins happun to Jerusalem plus Judah, and las-las, he throway dem komot from hin front—naso Zedekiah turn against di king of Babylon.
  4. E con happun sey, for di ninth year of Zedekiah as king, di tenth day of di tenth month, Nebuchadnezzar king of Babylon march against Jerusalem wit all hin army. Dem gada against Jerusalem, con build wall to attack round di city.
  5. And enemies surround di city until di eleventh year of king Zedekiah.
  6. By di ninth day of di fourth month, di hunger for di city con serious well-well—sote di pipo for di land no con see any food to chop.
  7. Di enemies con break di wall enta di city, and even though di Chaldeans (di pipo of Babylon) bin surround di city, all di sojas run for night pass di gate between di two walls near di king garden. And dem follow di road of di smooth-land,
  8. but di army of di Chaldeans (di pipo of Babylon) con pursue di king, and dem catch Zadekiah for di smooth-land of Jericho, and all hin army run from am.
  9. So dem catch di king, con carry am go meet di king of Babylon for Riblah, for di land of Hamath, na for there he judge Zedekiah.
  10. Na for Riblah di king of Babylon take kill Zedekiah sons for hin korokoro eyes, and he still kill di princes of Judah.
  11. Naso he komot Zedekiah eyes, he tie Zedekiah wit bronze chain, con carry am go Babylon, he put am for prison until di day wey he kpeme.

Dem Burn Baba-God House Plus Di City

12. On di tenth day of di fifth month, for di nineteenth year of Nebuchadnezzar as king of Babylon, Nebuzarandan wey be di commander of di guard, wey dey work for di king of Babylon, con enta Jerusalem.

13. He burn Baba-God house, di king palace, plus all di houses for Jerusalem; and he burn all di houses of di strong men—wit faya.

14. Naso all di sojas of di Chaldeans wey dey wit Nebuzarandan—dia commander, con break all di walls wey dey round Jerusalem.

15. So Nebuzarandan wey be di commander of di guard, con carry some of di pipo wey poor pass for di land as prisoners, di rest of di pipo wey remain for di city, di pipo wey bin surrender to di king of Babylon, plus di rest of di artists.

16. But Nebuzarandan wey be di commander of di guard, con leave some of di pipo for di land—to take care of di grape-farms and oda farms.

17. Evensef, di Chaldeans [di pipo of Babylon] break di bronze pillar, and dia solid-bottom, and di big bronze basin wey dem dey call ‘Di Sea,’—wey dey for Baba-God house; and dem carry all di bronze go Babylon.

18. Dem still carry di pots, shovels, wick-cutters, bowls, spoons , wit all di bronze containers wey dem dey use take serve for Baba-God house.

19. Nebuzarandan wey be di commander of di sojas still carry small basins, firepans, bowls, big-pots, lamp-stands, spoons, plus cups—anytin wey dem make wit pure gold or fine silver.

20. As for di two pillars, di big basin wey dem dey call di ‘Sea,’ di twelve bronze malu wey dey under di big basin, and di basin-stand, wey king Solomon bin make for Baba-God house; di weight of di bronze of all dis tins heavy well-well sote dem no fit measure dem.

21. Everi single pillar tall reach 27 feet, and round di body na 18 feet, and di body of di pillars thick reach 3 inches. Inside di pillar get hole like pipe.

22. Di cap-of-di-pillar wey be bronze, wey dey for on top of di pillar—high reach 7 ½ feet, and dem use bronze take make net-design plus pomegranates—round di cap-of-di-pillar. Di second pillar wit di pomegranates resemble dis one sef.

23. Everi single cap-of-di-pillar get 96 pomegranates for di sides, and all di pomegranates wey dey round di net-design na 100.

Dem Catch Di Pipo Go Babylon

24. Di commander of di guard carry Seraiah wey be di chief priest, Zephaniah wey be di next priest for rank, plus di three guards for di door.

25. From di pipo wey remain from di city, he carry one officer wey dey in charge of di army, seven of di king close padi (advisers) wey dem see for di city, di chief writer of di army wey dey register di sojas of di land, plus sixty men wey dem see for di city.

26. Nebuzarandan wey be di commander of di guard carry dem go meet di king of Babylon for Riblah.

27. Na for there for Riblah, for di land of Hamath, nahin di king of Babylon take nack dem down, con kill dem. Naso dem take carry di pipo of Judah—as prisoners from dia own land.

28. Dis na di pipo wey Nebuchadnezzar carry komot: for di seventh year; 3,023 Jews

29. For di eighteenth year of king Nebuchadnezzar, he carry 832 pipo from Jerusalem as prisoners;

30. For di twenty-third year of Nebuchadnezzar, Nebuzarandan wey be di commander of di guard carry 745 Jews as prisoners. So dem carry 4,600 pipo all togeda.

Evil-Merodach Release Jehoiachin From Prison

31. E con happun sey, on di twenty-fifth day of di thirty-first year wen Jehoiachin di king of Judah—enta foreign land, for di first year wen Evil-merodach be king of Babylon,  he show favour to Jehoiachin wey be di king of Judah, con release am from prison.

32. And he follow Jehoiachin tok wit good-heart, con make Jehoiachin king-chair high pass di king-chair of di oda kings wey dey wit am for Babylon.

33. So Jehoiachin change from hin prison clothes, he con dey always chop from di king table for di rest of hin life.

34. Di king of Babylon con dey provide for Jehoiachin everi day, for di rest of hin life, until di day wey he die.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website