Amos

Amos Chapter 1

Abeg click here to share dis post

         Judgement On Israel Neighbours

  1. Na dis be di words of Amos, one of di shepherds of Tekoa—wetin he see about Israel two years before di earthquake, wen Uzziah be di king of Judah, and Jeroboam wey be di son of Jehoah be di king of Israel.
  2. He tok sey, “Baba-God go shout from Zion, and he dey raise hin voice from Jerusalem; di green-land of di shepherds don dry kpatakpata, and di up of mountain Carmel go dry.”
  3. Na wetin Baba-God tok be dis, ‘I no go turn back my punishment on Damascus becos of dia three sins, even for four.’ Becos dem do Gilead like corn or wheat wey dem use iron tool take komot di seeds.
  4. But I go send faya to di house of Hazael wey go burn di palaces of Ben-Hadad.
  5. I go break down di gates of Damascus sef; I go scata di pipo wey dey for bottom-of-di-mountain wey dem dey call Aven, and di leader of Beth-Eden. Di pipo of Syrian go be prisoners of war for Kir,” Naso Baba-God tok.
  6. Dis na wetin Baba-God tok: “Becos of three sins wey Gaza commit, even four sins; I no go turn back dia punishment.” Becos dem catch di whole community, con sell dem to Edom,
  7. I go send faya put for di walls of Gaza wey go burn dia palaces.
  8. I go scata di pipo of Ashod, con kill di king of Ashkelon. I go turn my hand against Ekron, till di last pipo of di Philistines kpeme,” naso Baba-God Almighty tok.
  9. Na wetin Baba-God tok be dis: “Becos of three sins of Tyre, even for four, I no go turn back dia punishment”; becos dem sell di whole community of pipo wey dem catch as prisoners—to Edom, and dem no respect a di agreement of dia broda.
  10. But I go put faya on di walls of Tyre wey go burn her palaces.
  11. Na wetin Baba-God tok be dis: “Becos of three sins of Edom, even for four, I no go turn back dia punishment”; becos he pursue hin brodas wit sword, di pipo of Israel; and he no sorry-for dem. Dem always kill dem as dem dey vex, and dem no wan stop to dey vex.
  12. But I go send faya on Teman, wey go burn di palaces of Bozrah.
  13. Dis na wetin Baba-God yarn: “Becos of three sins of Ammon, even for four, I no go let dem escape wit-out punishment!” Becos dem open di belle of di women wey get-belle for Gilead, so dat dem go fit push dia border more-more.
  14. I go put faya on di walls of Rabbah wey go burn dia palaces. Di war go come meet dem wit shouting, and heavy-breeze for day of rolling-breeze.
  15. Both dia king and princes go enta foreign land as prisoners,” Na wetin Baba-God tok be dis.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website