Amos Chapter 2

Abeg click here to share dis post

Judgement Against Moab, Judah Plus Israel

  1. Na wetin Baba-God tok be dis: “Becos of three sins wey Moab commit, even four sins, I must punish dem”; becos dem born di bones of di king of Edom (di pikin-pikin-pikin of Esau) to ashes.
  2. I go send faya on Moab wey go burn di palaces of Kerioth. Moab go go down wit serious katakata, inside di cry of war, and di sound of trumpet.
  3. I go scata her rulers, con kill all di princes wit am,” naso Baba-God yarn.
  4. Na wetin Baba-God tok be dis: “Becos of three sins, or for four, I no go turn back dia punishment. Becos dem fashi Baba-God law, and dem no keep hin words, becos fake gods don make dem waka miss-road, di gods wey dia papa-papa-papa bin follow,
  5. Naso I go send faya to Judah wey go burn di palaces of Jerusalem.”
  6. Dis na wetin Baba-God tok: “Becos of three sins of Israel, and for four sins (di pipo of Israel dey always sin against me), I no go stop to punish dem; becos dem sell innocent pipo becos of moni, and dem sell poor pipo—for sandals.
  7. Dem march poor pipo head for ground, con spoil di way of pipo wey dem dey oppress—for dia way. Papa and son dey friend di same girl—to corrupt my holy name.
  8. Dem dey lie down near everi altar wit cloth wey dem collect from pesin wey borrow moni from dem. Dem dey drink ogogoro wey dem obtain from pipo wey dem fine—for inside di shrine of dia gods.

Israel No Dey Greatful

9. But I scata di Amorites for dia front even though dem tall like cedar trees, con strong like oak trees. But I scata dia fruit wey dey for up and dia root wey dey for ground.

10. “I carry una komot from Egypt sef, and I lead una for forty years inside di desert, to give una di land of di Amorites.

11. I raise prophets among una sons, con separate some of una young guys to serve me specially [Nazirites*]. Abi no be so, pipo of Israel?” naso Baba-God dey ask.

12. “But una make di Nazirites dey drink ogogoro, and una tell di prophets sey make dem no prophesy.

13. “Now I go press una down,  like truck wey dem overload wit bundle of corn.

14. Di fast pipo no go fit escape, di strong pipo no go fit gada dia pawa, and di fighter no go fit save hin life.

15. Di shooter no go fit stand hin ground, pesin wey sabi run—no go fit escape, and di horse-riders no go fit save dia life.

16. Even di soja wey get-mind pass—go run naked on dat day,” naso Baba-God tok.


Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website