Haggi

Haggi Chapter 2

Abeg click here to share dis post

Di Levels Wey Baba-God Promise For Hin New House

  1. On di twenty-first day of di seventh month, Baba-God word come meet Haggai wey be Prophet:
  2. “Yarn Zerubbabel wey be di son of Shealtiel, di govnor of Judah, and Joshua wey be di son of Josedech, di high priest, plus di whole pipo wey remain. Ask dem sey,
  3.  ‘Which one of una dey, wey bin see di house as e fine reach before? How e be for your eyes now? Abi e no be like notin for your eyes?
  4. Baba-God tok sey, ‘But now I wan make you dey strong, oh Zerubbabel; dey strong, oh Joshua wey be di son of Josedech wey be di high priest. Make una dey strong, all of una wey be di pipo of dis land, and make una work becos I dey wit una,’ naso Baba-God Almighty yarn.
  5. ‘Based-on di words of di agreement wey I make wit una—wen una komot from Egypt, naso my Spirit still dey wit una. So make una no dey fear.’
  6. “Dis na wetin Baba-God Almighty tok: ‘E no go tey, I go shake di heaven and di earth again, di big-rivers, plus di dry land.
  7. I go shake all di nations, and dem go carry all di beta-beta-tins of di nations come dis worship-place. I go full dis place wit levels,’ dis na wetin Baba-God Almighty tok.
  8. ‘Na me get di silver and na me get di gold,’ naso Baba-God Almighty tok.
  9. ‘Di levels of dis house now, go plenty pass di levels of di former house,’ na wetin di Almighty yarn, ‘And I go give una peace for dis place,’ na wetin Baba-God Almighty tok.”

Di Pipo Don Corrupt

10. On di twenty-fourth day of di ninth month, for di second year of Darius, Baba-God word come meet prophet Haggai sey:

11. “Dis na wetin Baba-God Almighty tok: ‘Ask di priest wetin di law dey yarn:

12. “If to sey pesin carry meat from di holy sacrifice for inside hin cloth, and hin cloth touch any bread or stew, wine, ororo, or any kind of food, abi e go make dat food holy sef?”’” Naso di priest ansa, “Lai-lai.”

13. Naso Haggai ask sey, “If pesin no clean becos he touch deadbody, and di pesin con touch any of dis food, abi di food sef go corrupt?” And di priests ansa am, “Before nkor? Yes!”

14. Haggai con ansa dem sey, “Naso e be sef wit dis pipo and dis nation wey I dey look so,’ naso Baba-God tok, ‘Anytin wey dem dey do, or anytin wey dem dey give Baba-God for there—no clean.

Baba-God Promise Blessing

15. ‘Now abeg reason dis tin well-well from today go—reason how tins bin dey before una start to lay di foundation for Baba-God house;

16. Since those days wen una hope for 200 kilograms of wheat—and una see only 10 kilograms, and una hope for 50 jugs of wine from di wine-factory, but una see only 20 jugs.

17. I send blight plus mildew [disease for farm], plus ice-stone to spoil everitin wey you try to plant, but una no still repent,’ naso Baba-God tok.

18. ‘From dis day go, from dis twenty-fourth day of dis ninth month, calm down make una reason di day wen dem set di foundation of Baba-God house—reason am:

19. Abi seed still dey for una store? Una neva harvest una vine tree, fig trees, pomegranates, plus olive trees, but from now on, I go bless una.”

Zerubbabel Na Baba-God Seal

20. Baba-God word come meet Haggai di second time for di twenty-fourth day of di month:

21. “Tell Zerubbabel wey be di govnor of Judah sey, I go shake di heavens plus di earth.

22. I go overthrow di king-chair of kingdoms, and I go scata di pawa of foreign kingdoms. I go overthrow di horse-moto plus dia riders; horses plus di pipo wey dey ride dem go fall, all of dem go fall by dia own broda sword.

23. Baba-God Almighty tok sey, ‘On dat day, I go take you, oh Zerubbabel my servant, wey be di son of Shealtiel, and I go make you be like ring wey be seal. Na you I choose,” naso Baba-God Almighty yarn.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website