Malachi

Malachi Chapter 1

Abeg click here to share dis post

  Baba-God Love Israel

  1. Dis na prophecy: Baba-God word to Israel tru Malachi:
  2. Baba-God tok sey, “I don love you, but una dey ask, ‘How you take love us?’ Baba-God tok sey, “Abi Esau no be Jacob broda,
  3. but I love Jacob, and I hate Esau, and I don turn hin land and mountain to waste land, con turn hin land to  desert of jackal [wild animals].
  4. Edom fit tok sey, ‘Even though dem don nack us down, we go build again from scata-scata.” But dis na wetin Baba-God Almighty yarn: “Dem fit build, but I go scata am. Dem go call dem di Land of Wickedness, pipo wey Baba-God dey vex for forever.
  5. Una go see am wit una own eyes, con tok sey, ‘Baba-God na ogbonge, and he go get levels even far-far pass di borders of Israel!’

Offerings Wey No Good

6. “Son dey honor hin papa and servant dey respcet hin oga. If I be papa, where my respect? If I be your Oga, where di respect wey una suppose give me?” na wetin dey Almighty dey ask una, “Chai priests, na una dey use my name play.” But una go ask sey, ‘How we take use your name play?’

7. “Una dey put food wey no clean for di altar. But una dey ask, ‘How we take downgrade your name?’ “Una downgrade my name wen una tok sey Baba-God altar no need respect.

8. Wen una dey bring animal wey don blind for sacrifice—abi dat one no be wrong tin? Wen una sacrifice animal wey no fit waka or wey get disease—abi no be evil tin be dat? Go give am to your govnor, con see if  he go happy wit you, or if he go accept am from you?” na wetin Baba-God Almighty dey ask.

9. “But now, una dey beg for Baba-God to show us hin grace! But wen una bring dat kain offering, why he go con show you favour at all?”—dis na wetin Baba-God Almighty dey ask.

10. “How I wish sey one of una fit close di doors of di church, so dat una no do light useless faya for my altar! I no dey smile wit una,” naso Baba-God Almighty tok, “And I no go accept any offerings from una hands.

11. My name go be ogbonge for di nations—from where di sun take dey rise, reach where e take dey go down. For everi where, dem go bring incense plus clean offering to my name, becos my name go be ogbonge for all di nations,” naso Baba-God Almighty tok.

12. “But una don spoil my name wit wetin una dey do; by bringing food wey no good, and una dey tok sey e dey okay to downgrade Baba-God table.

13. Una still tok sey, ‘E dey too hard to serve Baba-God,’ and una dey raise una nose against me,” naso Baba-God Almighty tok. “Naso una give me animals wey dem tiff, or wey no fit waka, and wey dey sick! Make I collect all dis kain offering from una hand?” naso Baba-God dey ask.

14. “But curse dey on di head of wuru-wuru pesin wey promise to give he-goat from hin animals, but he con lata sacrifice animal wey get comma for body to Baba-God. I be great king, and dem dey fear my name among nations,” naso Baba-God Almighty tok.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website