Matthew

Matthew Chapter 19

Abeg click here to share dis post

Divorce

1. Wen Jesus don tok dis tins finish, he
komot from Galilee go around Judea—for di oda side of di Jordan.

2. Plenty pipo follow am, and he heal all of dem for there.

3. Some Pharisees come meet am to test am. Dem ask am sey, “E dey right for man to pursue hin wife komot for any and everi reason?”

4. Jesus ansa dem, “Una neva read sey from starting, Baba-God ‘make man and woman.’

5. He con sey, ‘Nahin make man go leave hin papa and mama, and he go join wit hin wife, and di two of dem go turn to one body’

6. So dem no be two again, but one. So
wetin Baba-God don join togeda, make no man separate am.”

7. Dem con ask am, “Why e be sey Moses tok sey man fit give hin wife certificate of divorce, con pursue her komot?”

8. Jesus ansa dem, “Moses allow una
pursue una wife komot, becos una heart strong. But no be so e be from di starting.

9. I dey tell una sey any- pesin wey pursue hin wife komot, except she dey unfaithful, con marry anoda woman— dey commit adultery.”

10. Di disciples con tell am sey, “If naso
husband and wife mata be, e go beta make pesin no marry.”

11. Jesus con ansa, “No be everi-pesin go
like dis tok, but only those pipo wey fit
accept am.

12. Some pipo be eunuch wey dem born dem like dat; and some pipo be eunuch becos na men make dem be like dat; and odas be eunuch becos of di kingdom of heaven. Pesin wey fit accept am—make e accept am.”

Jesus And Di Small Pikin

13. Dem carry small small pikin come meet Jesus make he lay hin hands on dem, con pray for dem. But di disciples change-am-for di pipo wey carry di small pikin come.

14. Jesus con tok sey, “Make di small small pikin come meet me, and make una no block dem from di kingdom, pipo like dem nahin get di kingdom of heaven.”

15. Wen he don lay hin hands on dem con
bless dem, naso he waka komot from dat side.

Di Young Man Wey Get-moni

16. Naso one man come meet Jesus, con ask am sey, “Teacher, which good tin I must do to get life wey go last forever?”

17. Jesus ansa am, “Why you dey ask me
about wetin dey good? Na only one Pesin
good—only Baba-God. If you wan enta di
life wey dey last forever, obey di
commandments.”

18. Di man con ask am, “Na which one?”
Jesus ansa am sey, “ ‘No kill pesin, no
commit adultery, no tiff, no lie for pesin
head.

19. Respect your papa and your mama,’ and ‘love your neighbour as you take love
yoursef.’ ”

20. Di young man con tok sey, “I don do all
dis tins. Wetin still remain for me to do?”

21. Jesus ansa am, “If you wan dey perfect, go sell everitin wey you get make you give poor pipo, and you go get beta-beta-tins for heaven. Den come follow me.”

22. Wen di young man hear wetin Jesus tok, he con dey feel sad, becos he get-moni well-well.

23. Naso Jesus tell hin disciples sey, “I dey
tell una, true- true, e dey hard for bigman to
enta di kingdom of heaven.

24. I dey tell una sey, e easy pass for camel to pass tru di eye of niddle, dan for bigman to enta Baba-God kingdom.”

25. Wen di disciples hear wetin he tok, dem
surprise well- well con ask am sey, “So who
fit get salvation?”

26. Jesus look dem, con tok sey, “Dis tin no
dey possible wit man, but everitin dey
possible wit Baba-God.”

27. Peter ansa am, “We don leave everitin
wey we get—con follow you! Wetin we go
con gain?”

28. Jesus con tell dem sey, “I dey tell una di truth, wen all tins go dey new again, wen
Man-pikin go sidon for di king-chair wey get levels, una wey don follow me—go sidon for twelve king-chair sef, to judge di twelve tribes of Israel.

29. Any-pesin wey don leave houses or
brodas, or sistas, or papa, or mama or
pikin or land becos of me, go get hundred
times more, and he go inherit everlasting
life.

30.But many pipo wey be di first—go be
last, and many pipo wey be last—go be
first.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website