Matthew

Matthew Chapter 8

Abeg click here to share dis post

Di Man Wey Get Leprosy

1. Wen Jesus come down from di
mountain, plenty pipo follow am.

2. Naso one man wey get leprosy kneel
down for hin front—con tok sey, ‘Chai my
Oga, you fit heal me if naso you want am!’

3. Naso Jesus touch di man, con tok sey, “I
wan make you dey alright. Oya receive your
healing!” Naso di man sharply heal from hin leprosy.

4. Jesus con tell am sey, ‘No gist any-pesin
wetin happunoh. But you fit go show yoursef to di priest, and make you go give di offering wey Moses tell una make una give—as testimoni for dem.”

Di Faith Of Di Oga For Army

5. Wen Jesus enta Capernaum, one oga for
army come meet am, con dey ask am for epp.

6. He tok sey, “Oga my servant dey suffer
well-well for house and hin body don
paralyze.”

7. Jesus con tell am sey, “I go come heal am for your house.”

8. So di soja tok sey, “Oga, I no get levels
reach for you to enta my house. But just tok di word and my servant go heal.”

9. Mesef, I be man wey dey under pawa,
and wit plenty sojas wey I dey command. I
go tell one sey, ‘Go,’ and he go go; and I go
tell anoda one sey, ‘Bia,’ and he go come. I go tell my servant sey, ‘Do dis,’ and he go do am.”

10. Wen Jesus hear wetin di man tok, he
surprise, con tell di pipo wey dey follow am
sey, “I dey tell una di truth, I neva see pesin
wey get dis kain ogbonge faith for Israel.

11. I dey tell una sey plenty pipo go come
from di east and west, and dem go sidon for di party wit Abraham, Isaac and Jacob for di kingdom of heaven.

12. But na for inside darkness—where pipo
dey cry, and pipo dey bite dia teeth wit
pain—nahin Baba-God go pursue di sons of
di kingdom.”

13. Jesus con tell di army commander sey,
“Dey go house! Your servant don already
heal as you believe.” And hin servant con
true-true heal di time wey Jesus tok am.
Jesus Heal Plenty Pipo

14. As Jesus enta Peter House, he see Peter wife-mama lie down for bed wit fever.

15. He touch her hand and di fever vanish,
naso she stand up con make food for dem.

16. Wen evening reach, dem carry plenty
pipo wey bad-spirit possess come meet
Jesus, and he pursue all di spirit komot wit
one single word, and he heal all di pipo wey
dey sick.

17. Dis one confam wetin Baba-God bin tok tru prophet Isaiah: “He carry awa sickness plus disease komot.”

Wetin E Cost to Follow Jesus

18. Wen Jesus see di plenty pipo wey gada
round am, he con tell dem sey he wan cross go di oda side of di water.

19. Naso one teacher of dilaw come meet
am, con tell am sey, “Teacher, I go follow
you go any dey obey am!” where you go.”

20. Jesus ansa am sey, “Foxes get holes, and birds wey dey fly for sky get bird-house, but Man-pikin no get where to rest hin head.”

21. Anoda disciple con tell am sey, “Make I
first go bury my papa.”

22. But Jesus tell am sey, “Follow
me—make deadbody bury deadbody.”
Jesus Cool Di Strong-Breeze Down

23. He con enta inside di boat, and hin
disciples follow am.

24. Before you know, one kain strong-breeze wey make di water vex—con start to
dey blow, sote di water wan cover di boat.
But Jesus dey sleep.

25. Naso di disciples go wake am up, con tell am sey, “Save us Jesus make water no carry us go!”

26. He con tok sey, “See una wey get small
faith, why una dey fear like dis?” Naso he
stand up, con tell di strong-breeze to stop,
and di strong-breeze plus di water con cool
down.

27. Di men surprise, con ask, “Which kain
man be dis sef? Even heavy-breeze and di
water

He Heal Two Men Wit Evil-spirit

28. Wen he reach di oda side for around
Gadarenes, two men wey evil spirit dey
worry— come out from di graves come meet Jesus. Pipo no dey pass di area again becos di men fit fight pesin.

29. Dem con dey shout for Jesus, “Wetin you want from us Jesus, Baba-God pikin? Abi you don come here to suffer us before awa time reach?”

30. Plenty pigs dey for one corner for there,

dey chop for around where dem dey.

31. Di evil spirit con beg Jesus sey, “Abeg, if you wan pursue us, pursue us go those pigs body.”

32. Naso he tell dem sey, ‘Oya make una dey go!” So dem komot—go enta di pigs body. All di pigs crase enta di deep water—con kpeme.

33. Those pipo wey dey take care of di pigs
run go inside town, con gist pipo everitin
wey sup, and wetin happun to those men wey evil spirit bin dey worry.

34. Naso di whole town con waka go meet
Jesus. Wen dem see am, dem beg am sey
make he komot for dia area.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website