Zechariah Chapter 8

Abeg click here to share dis post

Baba-God Promise To Bless Jerusalem

  1. Baba-God Almighty word come meet me again, sey,
  2. “Dis na wetin Baba-God Almighty tok: ‘My love for mountain Zion strong well-well and e dey ginger me; I dey ginger for Jerusalem wit serious vex [against her enemies].’
  3. “Dis na wetin Baba-God tok: ‘I go come back to Zion and I go stay for Jerusalem. Naso dem go con call Jerusalem di City of Truth, and dem go call am di mountain of Baba-God Almighty—di Holy Mountain.’
  4. “Dis na wetin Baba-God Almighty tok: ‘Men and women  wey don old well-well go sidon for di streets of Jerusalem again, all of dem wit dia walking-stick for dia hand becos dem don old well-well.
  5. Guys and babes go plenty for di street of di city—dem go dey play for there.”
  6. “Dis na wetin Baba-God Almighty tok, ‘All dis tins be like sey e no dey possible now, for di eyes of dis remaining pipo; abi e no  dey possible for my eyes?’ naso Baba-God Almighty dey ask
  7. “Dis na wetin Baba-God Almighty tok, ‘See, I go save my pipo from di kontris of di east plus west.
  8. I go carry dem come back, con stay for Jerusalem; dem go be my pipo, and I go be dia God wit truth plus goodness.”
  9. “Dis na wetin Baba-God Almighty tok: ‘Una wey dey dis days—wey don dey hear dis word of di prophets wey bin dey on di day wen dem lay di foundation of Baba-God Almighty house; make una hand dey strong—so dat Baba-God house go fit stand.
  10. Before these days, work no bin dey for man or even animal. No pesin fit go-come—to do dia business safely becos of di enemies, becos I bin make everi man dey fight hin neighbour.
  11. But now, I no go do di remaining of dis pipo as I take do  before-before,’ naso Baba-God  Almighty tok.
  12. “Di seeds go grow well, di vine tree go produce e fruit, di ground go produce e harvest, and heaven go drop e rain. I go give all dis tins as blessings to di remaining of dis pipo.
  13. And e go happun sey, as nations dey yab una anyhow, chai Judah plus Israel, naso I go take save una, and una go be blessing. No let fear catch una, but make una hand dey strong.’
  14. “Dis na wetin Baba-God Almighty tok: ‘Just as I bin make  up my mind to punish una, and I no sorry-for una papa wen dem bin make me vex,’ naso Baba-God tok,
  15. So again, these days, I don zero my mind to do beta tins for Jerusalem plus Judah. No let fear catch una!
  16. Na dis tins una go do: Make una dey tell unasef di truth, and make una give judgement of truth, justice plus peace—for una courts.
  17. No plan bad-bad-tins for una heart against una neighbour, and no like to swear wit wetin no be true; becos I hate all dis tins,’ naso Baba-God tok.”
  18. Baba-God Almighty word come meet me again, sey,
  19. “Dis na wetin Baba-God Almighty tok, ‘Di festivals of di fourth, fifth, seventh plus tenth month go be di happy celebration, and jolly-jolly festival for Judah; so make una love truth plus peace.’
  20. “Dis na wetin Baba-God Almighty tok, ‘Pipo from nations plus cities from around di world go travel come Jerusalem;
  21. And di pipo wey dey stay for one city go go anoda city con tok sey, “Make we rush go pray for Baba-God house, and  to fyne Baba-God  Almighty face; I dey go sef.”
  22. Yes, and plenty pipo plus nations wey get pawa well-well go come Jerusalem to fyne Baba-God Almighty, and to pray for blessings for Baba-God front.’
  23. “Dis na wetin Baba-God Almighty tok: ‘Around dat time, e  go happun sey, ten men from all di languages plus nations go hold one Jew tight for hin cloth, con tok sey, “Make we follow you dey go, becos we don hear sey Baba-God dey wit you.”’”


Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website