Luke

Luke Chapter 18

Abeg click here to share dis post

Di Parable Of Di Widow Wey No
Wan Gree

1. Naso Jesus gist hin disciples one parable—to show dem sey make dem always dey pray, and no give up.

2. He tok sey:“E get one judge for one
town—wey no dey fear Baba-
God, and wey no-send any-pesin.

3. And e get one widow for dat town wey
dey always come meet am—dey beg am sey, ‘Epp me get justice against my enemies.’

4. “First-first, di judge no gree epp di
woman. But las-las he con tell hinsef sey,
‘Even though I no dey fear Baba-God, and I
no- send any-pesin,

5. but becos dis widow no wan let me rest, I go make sure sey I settle her mata—so dat she no go make me taya—as she dey come here like dis!’ ”

6. Jesus con tok sey, “Listen to wetin di
corrupt judge dey tok.

7. Abi una tink sey Baba-God no go bring
justice for di pipo wey he don choose, wey
dey cry to am day and night? Abi una tink sey he go just dey fashi dem everi time?

8. I dey tell una sey, he go make sure sey he settle dem kiakia. But wen Man-pikin go
show, una sure sey e go meet any-pesin wey still get faith—inside dis world?”

Di Parable Of Di Pharisee, Plus Di Tax
Collector

9. Dis parable wey Jesus gist dem na for
those pipo wey dey form sey dem holy, and
wey dey carry shoulder up:

10. “Two men go di worship-place [church]
go pray, one na Pharisee, and di oda one na tax collector.

11. Di Pharisee stand up con dey pray about hinsef: ‘Baba-God, I tank you sey I no be like oda men—robbers, evil doers, men wey dey climb pipo wife—or even like tax collectors.

12. I dey fast two times a week, and I dey
give tithe of everitin wey I get.’

13. “But di tax collector stand far-far. He no
fit even face heaven, but he nack hin chest
con tok sey, ‘Baba-God sorry-for me, I be
sinner.’

14. “I dey tell una sey—dis man go hin
house as beta pesin [righteous man] for
Baba-God eyes, instead of di Pharisee. Any-pesin wey dey feel big—go fall hin hand, and any-pesin wey humble hinsef—go get promotion.”

Di Small Pikin And Jesus

15. Pipo con dey carry small-small pikin
come meet Jesus—make he touch dem. Wen hin disciples see wetin dey happun, dem no gree.

16. But Jesus call di small- small pikin come where he dey—con tok sey, “Allow di small-small pikin come meet me, and make una no stop dem, Baba-God kingdom belong to pipo wey be like dis pikin.

17. I dey tell una di truth, any-pesin wey no
receive Baba-God kingdom like small-small
pikin no go fit enta inside am.”

Di Ruler Wey Get Moni

18. One ruler ask Jesus, “Good teacher,
wetin I must do to get life wey dey last
forever?”

19. Jesus ansa am, “Why you dey call me
good? No-pesin good—except Baba-God.

20. You know di commandments: ‘No sleep wit pesin wife, no kill pesin, no steal, no lie for pesin head, respect your papa and your mama.’ ”

21. Naso he tok sey, “I don keep all dis
commandment since I be small boy.”

22. Wen Jesus hear am, he con tell am sey,
“You still dey miss one tin. Sell everitin wey
you get—make you give poor pipo, and you
go get beta-beta-tins for heaven. Den make
you come follow me.”

23. Wen he hear am, he feel sad—becos he
get moni well-well.

24. Jesus look am—con tok sey, “E dey hard for bigman to enta Baba-God kingdom!

25. True-true, e easy pass for camel to pass tru di eye of niddle, dan make bigman enta Baba-God kingdom.”

26. Those pipo wey hear am con ask, “Who
go con get salvation?”

27. Jesus ansa dem, “Baba-God fit do wetin men no fit do.”

28. So Peter tell am sey, “We don fashi
everitin wey we get—con dey follow you!”

29. Naso Jesus tell dem sey, “I dey tell una di truth, no-pesin wey don leave house, or wife, or brodas, or papa and mama, and pikin becos of Baba-God kingdom—

30. wey no go receive wetin plenty pass dis
tins—for dis generation, plus everlasting
life—for di generation wey go come.”

Jesus Predict Hin Death Again

31. Jesus carry di twelve disciples go one
side, con tell dem sey, “We dey go Jerusalem and everitin wey di prophets tok about Man-pikin go come to pass.

32. Dem go carry am give world-pipo. Dem
go yab am, insult am, spit for hin body.

33. Dem go flog am, con kill am. And He go
raise up again on di third day.”

34. Di disciples no understand anytin wey he tok. Dem no know wetin e mean, and dem no know wetin he dey tok about.

Di Blind BeggarStart To Dey See Again

  1. As Jesus dey reach Jericho, one blind
    man sidon for corner of di road—dey beg.
  2. As he hear di plenty- pipo wey dey pass, he ask dem wetin dey happun.
  3. Dem con tell am sey, “Jesus of Nazareth dey waka pass.”
  4. Naso he start to dey shout, “Jesus, Son of David, sorry-for me!”
  5. Those pipo wey dey for front con
    change-am-for am, dem tell am sey make he sharrap, but he con dey shout more-more, “David Pikin, sorry-for me!”
  6. Jesus stop, con tok sey make dem carry di man come. Wen di man reach where he dey, Jesus ask am sey,
  7. “Wetin you wan make I do for you?” Di
    man con tok sey, “Oga, I wan make my eyes open.”
  8. Jesus con tell am sey, “Oya, open your
    eyes; your faith don heal you.”
  9. Sharp-sharp, he start to dey see, he follow Jesus, con dey praise Baba-God. Wen all di pipo
    see wetin happun, demsef praise Baba-God.


Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website