John Chapter 14

Abeg click here to share dis post

Jesus Comfort Hin Disciples

1. “No let wahala dey for your heart,
believe in Baba-God; and believe me sef.

2. For inside my papa palace—rooms
brekete; if no be so, I for no tell una. I dey go there go arrange place for una.

3. And wen I don go arrange place for una
finish, I go come back con carry una follow-body—so dat una sef go dey where I dey.

4. And una know where I dey go, and una
know di road to di place wey I dey go.”

Jesus Na Di Way To Di Fada

5. Thomas con tell Jesus sey, “Oga, we no
know where you dey go, so how we fit know di road?”

6. So Jesus ansa, “Na me be di way, di truthplus life. No- pesin fit come meet di Fada unless na tru me.

7. If to sey una really know me, una for know my Papa sef. From now on, una don know Am, and una don seeAm.”

8. Philip con tok sey, “Oga, show us di Fada and dat one go dey enuff for us.”

9. Naso Jesus ansa: “Philip, you no know me, even as I don dey wit una reach? Any-pesin wey see me, don see di Fada. Why you still dey tok sey, ‘Show us di Fada’?

10. You no believe sey I dey inside di Fada, and sey di Fada dey inside me? Di words wey I dey tok wit una—no be my words. But na from di Fada wey dey live inside me—wey dey do hin work.

11. Believe me wen I tok sey I dey inside di Fada, and di Fada dey for inside me; or else believe me becos of di works wey you don see.

12. I dey tell una di truth, any- pesin wey get faith in me – go do wetin I dey do. He go even do tins wey great pass all dis tins, becos I dey go meet di Fada.

13. And I go do anytin wey you ask wit my name, so dat di Son fit carry levels go meet di Fada.

14. If you ask me anytin wit my name; I go do am. Jesus Promise Di Holy Spirit

15. “If you love me, you go obey wetin I tok. 16. And I go ask di Fada, and he go give una anoda Pesin [Adviser, Comforter] to epp una, wey go dey wit you forever.

17. Na di Spirit of truth. Di world no fit accept am, becos dem no fit see am, or know am. But una know am, and he dey live wit una, and he go dey inside una.

18. I no go leave una like pipo wey no get mama and papa; I go come meet una.

19. E no go tey, di world no go see me again, but una go see me. Becos I dey alive, una sef go dey alive.

20. On dat day, una go know sey I dey inside my Papa. Una dey inside me, and I dey for inside una.

21. Any-pesin wey know my command, and wey obey dem, nahin be di pesin wey love me. My Papa go love any-pesin wey love me, and me sef go love am, and I wen e happun. go show myself to am.”

22. Naso Judas (no be Judas Iscariot) con tok sey, “But Oga, why you wan show yoursef to us, instead of to di world?”

23. Jesus ansa am sey, “If any-pesin love me, he go obey my teaching. My Papa go love am, and we go come meet am, con build awa house wit am.

24. Any-pesin wey no love me, no go obey di message wey I dey teach. Dis message wey una dey hear so no be my words; na di Fada wey send me nahin get dem.

25. “I don tok all dis tins as I still dey wit una.

26. But di comforter, wey be di Holy Spirit, wey di Fada go send wit my name—go teach una everi-everi, and go remember una about everitin wey I don tell una.

27. I dey leave una in peace; I dey give una my peace. Di peace wey I dey give una na di kain peace wey di world no fit give una. No let wahala dey for your heart, and no let fear catch you.

28. “Una hear me tok sey, ‘I dey komot, but I dey come back to meet una.’ If una love me, body go sweet una sey I dey go meet my Papa wey great pass me.

29. I don tell una now before e happun, so dat una go believe.

30. I no go fit tok wit una pass like dis, di ruler of dis world dey come. He no fit hold me down,

31. but di world must learn sey I love my Papa, and I dey do exactly wetin my Papa don tell me to do.“Come now; make we dey go.”


Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website