Proverbs (Pidgin Bible)

John Chapter 15

Abeg click here to share dis post

Di Tree And Di Branches

1. “Na me be di original tree, and na my Papa be di gardner.

2. He dey cut everi branch komot from my body, wey no gree produce fruit, but he dey trim everi branch wey dey produce fruit, so dat e go produce more fruit.

3. Una don already dey clean—wit di message wey I don tell una.

4. Stay inside me and I go stay inside una. No branch fit produce fruit by esef; e must connect to di tree. And una sef no go fit produce fruit unless una connect to me.

5. “Na me be di vine tree, and na una be di branches. If pesin stay wit me and I dey wit am, he go produce plenty fruit, but you no fit produce fruit wit-out me.

6. If any-pesin no stay wit me, he go be like branch wey dem throway, and wey go dry; dem dey carry dat kain branch throway inside faya make e burn.

7. If you dey inside me and my word dey for inside you, den you fit ask anytin wey you want, and you go get am.

8. Na levels for my Papa, sey una dey produce plenty fruits, and una dey show unasef as my disciples.

9. “As di Fada take love me, naso I take love una. Now make una dey inside my love.

10. If you obey wetin I dey tok, you go dey inside my love, just as I take obey wetin my Papa tok, and I dey inside hin love.

11. I don tell una dis tins, so dat my happiness go dey inside una, and make una joy complete.

12. Na my command be dis: make una love unasef as I take love una.

13. No man don ever get love wey great pass dis one, sey he give hin life for hin padi.

14. Una be my padi if una do wetin I tell una to do.

15. I no dey call una servants again. Servant no know hin oga business. Instead, I don call una my padi, becos I don show una everitin wey I learn from my Papa.

16. Una no choose me, but na me choose una, con select una to go produce fruit—fruit wey go last forever, so dat di Fada go give you anytin wey you ask for, in my name.

17. Dis na my command: Love each oda.

Di World Hate Di Disciples

18. “If di world no like you, get am for mind sey dem don first hate me.

19. If you belong to di world, di world go love you as e own. As e be so, una no belong to di world, but I don choose una komot from di world. Na wetin make di world hate una be dat.

20. Remember di words wey I tell una: ‘No servant great pass hin oga.’ If dem show me pepper, dem go show una pepper sef. If dem obey my teaching, dem go obey una sef.

21. Dem go treat una like dis becos of my name, becos dem no know who send me.

22. If to sey I no come follow dem tok, dia mind for no judge dem sey dem don commit sin. But now, dem no get any excuse for dia sin.

23. Any-pesin wey hate me—hate my Papa sef.

24. If to sey I no do those miracles wey no-pesin don do before, dia mind for no judge

Di Work Of Di Spirit

dem sey dem don commit sin. But now, dem don see di miracles, and dem still hate both me, and my Papa.

25. But dis na to confam wetin dem don write for dia Holy-books sey: ‘Dem hate me for no reason.’

26. “Wen di Comforter [di Spirit] show-face—wey I go send to una from di Fada, di Spirit of truth wey dey come from di Fada—e go tok about me.

27. And una must tok about me sef, becos una don dey wit me from di starting.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website