1st Thessalonians

1st Thessalonians Chapter 2

Abeg click here to share dis post

Paul Work For Thessalonica

1. Brodas, unasef know sey we no waste awa time come meet una.

2. As una know, even afta we don suffer before, and dem do us anyhow for Philippi, Baba-God give us di liver to tell una hin good news—even though pipo dey against us

3. Awa preaching no be from error, or bad mind, or wuru- wuru.

4. Instead, we dey tok as men wey Baba-God don call to preach di good news. We no dey tok to make men happy, but Baba-God wey dey test awa heart.

5. Una know sey we no use sweet-mouth at any time, or play una wayo—just becos we wan collect una moni; na Baba-God be awa witness.

6. We no dey fyne praises from men, or from una, or any- pesin, wen we for ask from una—as apostles of Christ.

7. But we do awa tins jeje among una, just like mama wey dey give pikin breast—take love her pikin.

8. We love una well-well sote body dey sweet us to share wit una—no be only di good news, but we share awa life sef, becos una con dey special to us.

9. Surely brodas, una remember awa hustle and suffer- suffer. We hustle day and night, so dat we no go be like load for any- pesin head—as we dey preach di good news of Baba-God to una.

10. Una be awa witness, and Baba-God sef be awa witness of how serious, pure, and perfect we bin dey among una wey believe.

11. Una know how we teach una, comfort una, and ginger all of una—as papa take dey treat hin pikin,

12. so dat una go live di life wey Baba-God go like—wey call una enta hin own kingdom and levels.

13. Nahin make us dey always tank Baba-God, becos wen una receive di word of God wey una hear from us, una accept am like sey no be ordinary man idea, but just as e be inside truth—Baba-God word wey dey work well-well inside una body wey believe.

14. Brodas, una con be like di followers of di churches of Baba-God for Judea—wey dey inside Christ Jesus. Una sef don suffer di same tins from una own kontri pipo, just as dem suffer from di Jews,

15. wey kill both Oga Jesus, and dia own prophets. Now dem don show us pepper sef. Dem dey offend Baba-God and dem dey against all men,

16. as dem try to stop us from yarning wit world-pipo [Gentiles], so dat dem go dey saved. By dis way, dem dey always full dia cup of sins. Las-las, Baba-God don dey use vex punish dem fully.

Paul Wan Really See Di Thessalonians

17. My pipo, as we fisikally komot from una side small, but awa heart still dey wit una, body scratch us well-well to come meet una.

18. So, we wan be come meet una, but me—Paul, I try to come everi time, but Satan no gree us.

19. Aftall, wetin be awa hope, or happiness, or di crown wey go make us happy? Abi no be una, for Oga Jesus front wen he go land?

20. True-true, na una be awa levels and happiness.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website