1st Thessalonians

1st Thessalonians Chapter 3

Abeg click here to share dis post

Stand Gidigbam Inside Christ

1. So as we no fit bear am again, we reason am sey—e beta make we dey alone for Athens,

2. and we send Timothy, wey be awa broda and servant of Baba-God, and awa fellow worker for di good news of Christ—to make una stand, and ginger una faith,

3. so dat no-pesin go dey shake from all dis palava, unasef know sey we suppose face dem.

4. True-true, wen we bin dey wit una, we tell una sey we go face wahala, just as e take happun as una know.

5. Nahin make me send Timothy, as I no fit bear am again. I send am to come see as una faith don be, so dat Satan no go tempt una by any means, and awa hustle go con be in vain. Timothy Words Wey Dey Ginger

6. But now wey Timothy don come meet us from una, and he don bring beta gist about una faith and love. He don tell us sey una dey always remember us wit beta way, and sey una wan see us—just as we sef wan see una,

7. so brodas, inside all awa wahala, and palava—una ginger us becos of una faith.

8. Na now we really dey live—becos una don stand gidigbam for Christ.

9. How we fit tank Baba-God reach for una, for all di happiness wey we get for Baba-God front becos of una,

10. as we dey pray well-well for night and day, so dat we go fit see una—and to complete wetin dey miss for inside una faith?

11. Now, make awa God and Papa hinsef, and awa Oga Jesus, show us road to come meet una.

12. Make Baba-God make una love for each oda brekete, and yanfu-yanfu, and for everi-pesin—just as we dey do to una,

13. so dat he go fit stand una heart to dey perfect inside holiness for front of awa God and Fada, wen awa Oga Jesus go show-face wit all hin holy-pipo.


Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website