2nd Timothy

2nd Timothy Chapter 1

Abeg click here to share dis post

1. Dis letter na from Paul, wey be apostle of Christ Jesus—by di will of Baba-God, based-on di promise of life wey dey inside Christ Jesus awa Oga.

2. I dey write dis letter to Timothy my dear son: Grace, mercy plus peace, from Baba-God di Fada, and Oga Jesus Christ. Abeg Make Una Dey Faithful

3. I tank Baba-God for you—di God wey I dey serve wit pure mind, just as my ancestors serve am, sey I dey always remember you for my prayer, both night and day,

4. as I dey remember your tears, I really wan see you, so dat belle go sweet me well-well.

5. Wen I remember di true faith wey dey inside you, wey first dey inside your grand-mama—Lois, and your mama Eunice, I believe sey di faith still dey inside you.

6. So I dey remind you to ginger di gift of Baba-God wey dey inside you, wen I lay hands on you.

7. Baba-God no give us spirit of fear, but di spirit of pawa, love, and sharp-mind.

8. So make you no dey shame to tok about Christ, or me wey be hin prisoner, but by di pawa of God inside you, follow me share inside di palava of di good news.

9. Baba-God save us, con call us to live holy life. Baba-God do am, no be becos of any beta tin wey we don do, but based-on hin own plan and grace—wey he give us inside Christ Jesus before di world start,

10. but now, dem don show- face as Jesus Christ awa Saviour land—wey cancel di pawa of death, con make pipo see di light of life and everlasting life—tru di good news.

11. Baba-God choose me as messenger, apostle, and teacher for world-pipo.

12. Na wetin make me dey suffer dis tins so. But shame no dey catch me, becos I know who I believe, and I dey convinced sey he fit keep wetin I commit to am—until dat day.

13. Hold tight to di pattern of correct teaching wey you don hear from me, wit faith, and love inside Christ Jesus.

14. Tru di pawa of di Holy- Spirit wey dey live inside us, guard di good tin wey dem don trust put for your hand.

15. You know sey everi- pesin wey dey around Asia don fashi me, even Phygellus sef and Hermogenes.

16. Make Baba-God sorry-for di family of Onesiphorus, becos he always ginger me, and shame no catch am becos of my chains.

17. Instead, wen he dey for Rome, he fyne me taya until he see me.

18. I pray sey make Christ give am mercy from Baba-God on dat day! And you know well-well as he take epp me reach for Ephesus.


Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website