Colossians Chapter 1

Abeg click here to share dis post

1. Dis letter na from Paul, wey be apostle of Jesus Christ, by di will of Baba-God, and from Timothy awa broda.

2. To di holy and faithful brodas wey belong to Christ for Colosse: Grace plus peace to una from Baba-God awa Fada, and awa Oga Jesus Christ.

Tanks-giving Plus Prayer

3. We dey always tank Baba-God, di Papa of awa Oga Jesus Christ, wen we dey pray for una,

4. since we hear about una faith inside Christ Jesus, and di love wey una get for all God-pipo,

5. becos of di hope wey dey for una for heaven. You get dis hope ever since you first hear about di truth of di good news.

6. Dis same good news wey come meet una, don dey spread around di world sef. E dey grow, just as e grow inside una—since di day wey una hear am, con sabi Baba-God grace for inside truth,

7. as una sef learn about di good news from Epaphras, wey dey work togeda wit us—he be faithful servant of Christ for una.

8. He tell us about una love inside di Spirit sef.

9. Nahin make since di day we hear about una, we neva stop to dey pray for una, and to ask Baba-God make una sabi di tins wey he wan make una do, inside all wisdom, plus spiritual understanding,

10. so dat una go dey live life wit di fear of Baba-God, and una go make body sweet Baba-God for everi way, and una go sabi do everi beta works, and una go sabi Baba-God more-more.

11. We dey pray sef sey make you strong kakaraka wit full pawa, based-on Baba-God pawa wey get levels, so dat you go fit get full patience, endurance, plus happiness,

12. and tanks-giving to di Fada, wey make us share inside di birthright wey belong to God-pipo, wey dey live inside di light.

13. He don free us from di pawa of darkness, con carry us enta inside di kingdom of di Son wey he love,

14. nahin save us wit hin blood, con forgive awa sins. Christ Na Oga kpatakpata

15. Nahin be di image of di God wey we no fit see, di firstborn of everitin wey Baba-God make.

16. Na tru am Baba-God make everitin: tins wey dey for heaven, plus tins wey dey for earth, tins wey we fit see, plus tins wey we no fit see—whether na king-chair or pawas, or rulers or govments. Na tru am Baba-God take make everi-everi, and everitin na for am.

17. Christ dey before everitin, and dey hold everitin togeda inside hinsef.

18. And na Christ be di head of di body—di church, and nahin be di beginning, and di first born from di dead, so dat he go be oga kpatakpata for everi-everi.

19. Body sweet Baba-God to put hin full-package inside Christ,

20. and na tru Christ—Baba-God settle hin mata wit everitin—whether na tins for earth, or tins wey dey inside heaven, tru hin blood wey he shed for cross,

21. and una wey bin dey far- far from Baba-God, and una be hin enemies for una mind, becos of una evil ways, but now Christ don settle una wit Baba-God,

22. tru hin fisikal body as he die, to show you as holy pesin wit- out error, and wit-out shame for hin front,

23. if you true-true kontinu inside di faith, you stand gidigbam wit no-shaking, and you no move komot from di hope of di good news wey una don hear, and wey dem preach to everi living tin wey dey under heaven—of which I be messenger.

Paul Hustle For Di Church

24. Now I dey happy wen I suffer becos of una, e mean sey I dey share inside di remaining suffer- suffer wey Christ pass tru—by suffering for hin body—wey be di church.

25. Baba-God don give me di responsibility to serve as hin servant—to preach di full word of God to una.

26. Dis deep-mata bin dey coded since olden days and for plenty generations, but now Baba-God don show hin pipo.

27. Baba-God wish to make dem sabi wetin be di riches of di levels of dis deep-mata, among world-pipo [Gentiles]—and dis na Christ wey dey inside you—di hope of glory.

28. So we dey tok about Christ, we dey teach and warn everi-pesin, wit everi wisdom, so dat we go fit show everi-pesin as perfect pipo for inside Christ.

29. Nahin make me sef dey work and hustle, based-on Christ pawa wey dey work big tins inside me.


Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website