Colossians

Colossians Chapter 4

Abeg click here to share dis post

1. Oga, give your workers wetin dey right and fair, becos you know sey you sef get Oga for heaven.

More Teachings

2. Kontinu to dey pray seriously, dey watch inside your prayer—wit tanks-giving.

3. Make una pray for us sef, make Baba-God open door for awa message—so dat we go fit tok di deep-matas of Christ, wey make me dey for chains sef,

4. so dat I go fit tok, as I suppose tok am.

5. Use wisdom wen you dey run tins wit world-pipo; use everi chance well-well.

6. Make beta words always burku for your mouth, add salt join, so dat you go sabi ansa everi-pesin.

Las-las Greetings

7. Tychicus— my broda wey I love, go tell una all di gist about me; na faithful worker, plus fellow servant inside Christ.

8. I dey send am to una, becos I wan make he know about una condition, and to ginger una heart.

9. Onesimus, awa faithful and correct broda, wey be one of una pipo—go follow Tychicus come meet una. Dem go tell una everitin wey dey happun for here.

10. My fellow prisoner Aristarchus—dey greet una, even Mark sef, wey be Barnabas cousin. As I don tell una before; if Mark come meet una, make una welcome am,

11. and Jesus wey dem dey call Justus. Na dem be di only Jews among my fellow workers for Baba-God kingdom, and dem don comfort me wella.

12. Epaphras, wey be one of una, and servant of Christ Jesus—dey send hin greetings. He dey always prayer for una seriously—so dat una go fit stand gidigbam, and complete inside everitin wey Baba-God want make una do.

13. I dey sure sey Epaphras dey serious about una, and for God-pipo for Laodicea, and Hierapolis.

14. My love—Luke, wey be doctor, and Demas dey greet una.

15. Greet di brodas, wey dey for Laodicea, and Nymphas, plus di church wey dey for hin house.

16. Afta una don read dis letter, make una make sure sey dem read am for inside di church for Laodicea, and make una sef read di letter from Laodicea.

17. Tell Archippus sey, “Put-mind on di work wey you don receive from Baba-God—so dat you go do am.”

18. Me—Paul, dey write dis greetings wit my own hand. Remember my chains. Make grace dey wit you.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website