Ephesians

Ephesians Chapter 3

Abeg click here to share dis post

Paul Wey Be Preacher To Di Gentiles

1. For dis reason, me, Paul—di prisoner of Christ Jesus, sake of una world-pipo (Gentiles)—

2. surely una don hear about di work wey Baba-God give me, to carry hin grace come meet una.

3. As I don bin write una before, tru revelation—Baba-God hinsef show me hin deep-mata.

4. As una dey read wetin I write, naso una go sabi understand as I take dey reason di deep-mata about Christ.

5. Baba-God no show men of oda generations, but now—tru di Spirit, he don dey show hin holy disciples and prophets.

6. sey di Gentiles (world- pipo) don turn to Baba-God pikin togeda wit Israel. Now dem be both members of di same body, and both of dem go share di promise inside Christ—tru di good news.

7. By di gift of di grace of Baba-God, and hin pawa wey dey work well-well—nahin I take be minister.

8. Even though na my level small pass among God-pipo, Baba-God give me dis grace to preach to di Gentiles (world-pipo), about di riches of Christ wey pesin no fit understand finish.

9. Baba-God wey make everi-everi tru Christ, choose me to open everi-pesin eyes to dis deep-mata, wey he don hide inside hinsef—since di starting of di world.

10. Wetin bin dey for hin mind be sey, by now—tru di church, Baba-God go show all hin different wisdom to di rulers, plus govment for di heavens,

11. based-on hin everlasting plan, wey he achieve inside Christ Jesus awa Oga.

12. Inside Christ, and tru faith inside Christ, we fit get connection to Baba-God wit full-mind.

13. So I dey beg una, make una no lose mind—becos of di kasala wey I dey suffer for una—wey be una levels.

Prayer For Di Ephesians

14. Becos of dis, I go kneel down for front of di Fada of awa Oga Jesus Christ,

15. wey call di whole family for heaven and earth by dia name.

16. I pray sey from hin riches wey yanfu-yanfu, and wey get levels—he go ginger una wit pawa inside—tru hin Spirit.

17. Naso Christ go stay for inside una heart as una put faith on am. And I pray sey una go get root wey stand gidigbam inside love.

18. And make una fit understand, wit all God- pipo—how wide and long, plus how high and deep—di love of Christ be,

19. and to sabi di love of Christ, wey pass everi knowledge, and make una brekete wit Baba-God full package.

20. Now to am, wey fit do yakata, pass everitin wey we dey ask or tink, based-on di pawa wey dey run tins inside us.

21. To Am be di glory inside di church, by Christ Jesus—to all generations, for ever and ever! Amen.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website