1st John

1st John Chapter 3

Abeg click here to share dis post

1. See di kain ogbonge love wey Baba-God don give us, sote he don call us hin pikin! And na wetin we be—be dat! Wetin make di world no know us be sey, dem no sabi am.

2. My love, now we be Baba-God pikin, but we neva know as we go be wen Christ go show-face. But we know sey we go be like am, and we go see am as he really be.

3. And everi-pesin wey get dis hope inside am, dey keep hinsef pure, just as Christ take dey pure.

4. Everi-pesin wey commit sin dey break Baba-God law, and e no dey obey Baba-God law.

5. But una know sey Jesus show-face—so dat he go carry awa sins komot, and sin no dey inside am.

6. Any-pesin wey dey live inside Christ no dey commit sin. But any-pesin wey dey commit sin, neva see am or know am.

7. Dear pikin, no let any- pesin play you wayo. Any-pesin wey dey do di right tins, na good pesin, just as Christ dey good.

8. Any-pesin wey dey commit sin na from di devil, becos di devil don commit sin from di beginning. Nahin make Man-pikin show-face, to dabaru di devil works.

9. No-pesin wey be Baba-God pikin go kontinu to commit sin, becos Baba-God life dey for inside am; and he no fit commit sin, becos na Baba-God born am.

10. Dis na how we go take know who be Baba-God pikin, and who be devil pikin: Any- pesin wey no dey do di right tins no be Baba-God pikin, or any- pesin wey no love hin broda and sista.

Love Unasef

11. Dis na di message wey una don hear from di starting: Make we love one anoda.

12. No be like Cain wey kill hin broda. He belong to evil. And why he kill hin broda? Becos he dey do evil tin, and hin broda dey do di right tin.

13. My pipo, no surprise if di world hate you.

14. If we love awa brodas and sistas, e mean sey we don waka from death to life. But any-pesin wey no love hin broda and sista, dey live inside death.

15. Any-pesin wey hate hin broda or sista na killer. And una know sey no killer get everlasting life inside am.

16. Naso we take know di real love: Jesus Christ give hin life for us, and we sef suppose give awa life for awa brodas and sistas.

17. If any-pesin get-moni well-well, con see hin broda wey need epp, but he no sorry-for am, how Baba-God love take dey inside am?

18. My pikin, make we no dey only show love wit mouth or words, but wit action plus truth.

19. Naso we go take confam sey we belong to di truth, and we go get full-mind wen we dey stand for Baba-God front.

20. But if awa heart dey condemn us, Baba-God great pass awa heart, and he know everi-everi.

21. My love, if awa heart no condemn us, den we get full-mind for where Baba-God dey.

22. And we go receive anytin wey we ask from am, becos we obey wetin he tell us to do, con dey do di tins wey dey make belle sweet am.

23. And dis na hin commandment: to believe di name of hin Son Jesus Christ, and to love each oda as he tell us.

24. Those pipo wey dey obey Baba-God words—dey live inside am, and he dey live inside dem. And we know sey he dey live inside us by di Spirit wey he give us.


Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website